Kalaallit Nunaat sinnerlugu pinnerneqqusaannermut Miss Earthimut peqataalersoq
Kalaallit Nunaat sinnerlugu pinnerneqqusaannermi peqataasussap silap pissusiata allanngoriartornerata Kalaallit Nunaannut sunniutai nunarsuarmioqatitsinnut oqaluttuarisavai. Nulle qilanaarpoq pissangallunilu:
- Nuanneqaaq, pissanganaqaaq nutaanik misigisassaqarnissamut qilanaarpunga, pinnerneqqusaannermi Miss Earthimi peqataasussaq, Nulle Josephsen Maniitsuminngaaneersoq taama oqarpoq.
Nulle ilinniarnertunngorniarnini naammasseqammerpaa, ilinniartuunngorniarnerminilu pinngortitaq avatangiisillu immikkut sammisaralugit, taamaasillunilu Kalaallit Nunaat sinnerlugu pinnerneqqusaannermut Miss Earthimut piukkunarluartuulluni.
Kalaallit allat assigalugit pinngortitamik nuannarisaqartuuvoq. 176 centemeterisut angitigivoq, kusanartumik kalaalerpaluttummik isikkoqarluni, inuppalaartuulluni ammasuulluni sapiitsuullunilu.
- Taamaattumik Nulle Josephsen Kalaallit Nunaat sinnerlugu pinnerneqqusaannermut peqataanissaanut piukkunnarluarpoq, Miss Greenlandimi pisortaq, Aviaaja Hammeken Schultz oqarpoq.
- Inuit arnartaasa isikkuat immikkuullarissoq Nullep pigivaa taamaattumik pinnerneqqusaannermut piukkunnaateqarluarmat toqqarpara aamma ilinniarnertuunngorniarnermini pinngortitaq avatangiisillu immikkut sammarisammagit, Miss Greenlandip pisortaa Aviaaja Hammeken Schultz oqarpoq.
- Pinnerneqqusaannerup Miss Earthip siunertaraa nammineq nunagisamut attuumassuteqartumut pinngortitap avatangiisillu paasilluarneqarnissaat, pinnerneqqusaannerlu Miss Earth nunagisami atukkat ilisaritinneqarnissaannut atorluarneqarsinnaavoq, Aviaaja Hammeken Schultz oqarpoq.
- Silaannap kiatsikkiartornerata paasitinneqarnisaa pisariaqarpoq, silap pissusiata allanngoriartorneratigut Kalaallit Nunaat eqqugaammat aamma nunarsuup sinneranut sunniuteqarluni, Aviaaja Hammeken Schultz oqarpoq, nangillunilu:
- Silap pissusiata allanngorneratigut piniartut, ingammik avannaaniittut, eqqorneqarput piniarfigisartakkaminni piniarsinnaajunnaarmata aamma pinngortitami ataqatigiinneq allanngortussaavoq, kulturikkut kingornussatsinnut kinguaariinnut sunniuteqassalluni, Miss Greenlandip pisortaa Aviaaja Hammeken Schultz oqarpoq.
Kalaallit Nunaata arnat nunarsuarmi pinnerneqqusaannissaanut Miss Earthimut peqataanissaamut aningaasaateqarfinnut qinnuteqarlutik aallartissimallutik Aviaaja Hammeken Schultz oqarpoq.
