Kalaallit Nunaat Roskildemi apriilimi sammineqassaaq

Illoqarfiit ikinngutigiit, Roskilde aamma Nanortalik, peqatigiiffiat, Roskildep Kommunea, peqatigiiffiit, suliniaqatigiiffiit aamma kulturi pillugu ilinniarfiit 30-t missaanniittut suleqatigalugit festivali taanna aaqqissuunniarpaat.

Taakku isumaqarput Kalaallit Nunaat nittarsarneqarnerusariaqartoq, taamaattumik kalaallit eqqumiitsuliaannik saqqummersitsinikkut, tusarnaartitsisoqarneratigut, qitimmik takutitsinikkut, erinarsortartunik tusarnaartitsinikkut, kaffillernikkut, inuussutissarsiorneq pillugu ataatsimeersuartitsinikkut, atisanik mutinik takutitsinikkut, Domkirkemi kalaallit naalagiartinneqarnerisiut allarpassuartigullu malunnartinniarneqassaaq.

Isumassarsisup Alf Tornbergip, peqatigiiffimmi Roskilde Nanortalimmi siulittaasuusup, oqarnera naapertorlugu, kalaallit taakkulu kulturiata ilisimaneqarnerulernissaa festivalimi siunertaavoq.

- Aaqqissuussinermi Kalaallit Nunaat nuannersumik sammissavarput. Kalaallit qanoq atugarliortiginersut Danmarkimi tusagassiorfinni sammineqarpallaarsimavoq. Nuannersortaqarnera aamma ersersinneqartariaqarpoq. Naggueqatigiit Inuit kulturiat nukittooq, ukiunilu tusindtilippassuarni atuussimasoq, takutinniassavarput. Tassami Kalaallit Nunaanni pitsaasorpassuaqarpoq. Pisuussutit, eqqumiitsuliat, kulturi allarpassuillu, Alf Tornberg oqarpoq.

Kulturfestivaleqarnissaq pillugu paasisaqarnerorusukkaanni nittartagaq una takuneqarsinnaavoq: roskilde.dk.inuit.