Kalaallit Nunaat pillugu isumaqatigiikkallarnissaq Folketingimi politikerit isumaqatigiissutigaat

Kalaallit Nunaanni aatsitassat pillugit isumasiuinerit, apeqquteqaatit oqallinnerillu ingerlaqqittuarsinnarput, Folketingimilu partiit Kalaallit Nunaat pillugu oqaaseqartatui ullumikkut oqallisigeqqinniarlugu naapipput. Oqallinnerullu torernerusumik ingerlanneqarnerani ilaasortat akornanni isumaqatigiissutaavoq.

-Isumasiuinerpassuarni oqallinnernilu nipi tusarnernerulersimasoq malugisinnaavara. Naalakkersuisut siornatigumut naleqqiullugu apeqqutitsinnut tigussaanerusunik akissuteqartalersimapput. Apeqqutit arlariit suli akissuteqarfigineqanngitsut amigaatigineqarput. Maannali kinguneqartussanik akissuteqartoqartalerpoq, ataatsimoorlutalu aaqqiissutissamik nassaarniarnissarput naalakkersuisut soqutigigaat ersarilluni, Venstrep Kalaallit Nunaat pillugu oqaaseqartartua Gitte Lillelund Bech, naalakkersuisut Kalaallit Nunaat pillugu politikkerisaannik isorinnittupilussuusimagaluartoq oqarpoq.

Taanna Ellen Thrane Nørbylu Naalagaaffeqatigiit pillugit ukiormoortumik oqallittoqartalernissaanik siunnersuuteqaartuupput.

-Folketingimi oqallisigineqarnissaanut suliat ataasiakkaat aalajangiisuutinnissaannut Naalagaaffeqatigiinneq pingaaruteqarpallaarsoraarput. Taamaammat ukiumoortumik oqallittoqartalernissaa kissaatigaarput, tassanilu naalakkersuisut Naalagaaffeqatigiinnup katitigaanera, aningaasaqarneq allallu nassuiaateqarfigasassavaat.

Siunnersuutip oqaasertai, aamma Naalagaaffeqatigiit iluanni suleqatigiinnerunissamik imaqartut, partiit tamaasa ippassaq ualikkut ullaarlu isumaqatigiinniutigaat. Aamma Atlantikup avannaanit ilaasortaatit ilaliipput. Sara Olsvigilu oqarpoq:

-Siunnersuut iluarisimaaqaara, aamma taperserparput. Kalaallit Nunaat pillugu sulianik assigiinngitsunik saqqummiussisarfissatsinnik amigaateqarsoraagut, aatsitassat kisiisa pinnagit aammali pinerluttunik isumaginnittoqarfik, eqqartuussiveqarneq kalaallit Danmarkimi ikiortariallit allallu. Ukiumoortumik apeqqutaateqartarfissaq taama ittoq atorluarneqarsinnaasoraara.

Siunnersuut tamakkiisoq ima oqaasertaqarpoq:

- Danmarkip, Savalimmiut Kalaallit Nunaatalu Naalagaaffeqatigiinnerat Folketingip nuannaarutigaa.

- Namminersorneq pillugu inatsit tamatumalu danskit oqartussaasuisa Namminersorlutik Oqartussallu akornanni piginnaatitsinerit Danmarkip Kalaallit Nunaatalu akornanni attaveqarnermut tunngaviupput.

- Naalagaaffeqatigiinni periarfissat unammilligassallu ingerlaavartumik oqaloqatigiissutiginissaasa pisariaqartinneqarnera Folketingip naqissuserpaa.

- Pitsaasumik oqaloqatigiinnikkut Naalagaaffeqatigiinni illuatungeriit akornanni ataqqinnittumik naligiittumillu suleqatigiittoqarsinnaavoq peqatigisaanillu Naalagaaffeqatigiit ataatsimoorlutik pilersaarusiornerannik qulakkeerisoqarluni.

- Folketingip naalakkersuisut kaammattorpaat ukiumoortumik apeqquteqaatit aallaavigalugit oqallitsitsisassasut, tassani Naalagaaffeqatigiit periarfissaat unammilligassaallu asissuijuitsumik eqqartorneqarlutik.

- Folketingip Naalagaaffeqatigiit ineriartortinneqarnerisa siuarsarneqarnissaa siunertaralugu kaammattuutigissavaat, danskit naalakkersuisuisa kalaallillu naalakkersuisuisa suleqatigiinnerat Namminersorneq pillugu inatsisip killiliussaasa iluanni nukittorsarneqassassoq.

            - Folketingip danskit naalakkersuisui kaammattorpai kalaallit naalakkersuisui peqatigalugit Kalaallit Nunaanni aningaasaliinernik annertusaasoqassasoq nallersuunneqarsinnaasunik, ersarissunik niuernernikkullu atugassarititaasut aallaavigalugit – tassunga ilanngullugit danskit, tassuunalu Kalaallit Nunaata pinngortitami pisuussutai atorluarneqassapput Kalaallit Nunaanni aatsitassanut pilersaarusiukkamik aningaasaliinissamut periarfissaqarnissaq siunertaralugu.