Kalaallit Nunaat pillugu ilisimatusarusunneq assut pilerigineqarpoq
Ilinniarnissamut tapiissutit piviusunngorsimapput naalagaaffiup issittoq pillugu aningaasaateqarfia 9,7 millionit koruuninik, Ilinniartitaanermut Ilisimatusarnermullu Naalakkersuisoqarfiup 2,2 millionit koruuninik aningaasaliinerisigut.
Aningaasat ilisimatusartunut tallimanut atussallugit naammapput, Kalaallit Nunaat pillugu ilisimatusarnermut, aamma qallunaat-kalaallillu ilisimatusaqatigiinnerannut annertusaataasussaallutik.
- Qinnuteqartut 42-t ersersippaat, Kalaallit Nunaat pillugu ilisimatusarnerup soqutigineqarnerujussua, Pinngortitaleriffiup pisortaa nuannaaqisoq, Klaus Nygaard, oqarpoq.
Taassuma neriuutigaa ilisimatusarnissamut aningaasaliissutit, ilisimatusaataasartut, maannamiit assigiinngissitaarnerulernissaannut iluaqutaajumaartut.
Qinnuteqaatit aalajangiiffigineqartinnatik qallunaanit kalaallinillu suleqatigiissitanit arlalinnit misissoqqissaarneqarallassapput.
- Suliaq tamanna qaammatinik arlalinnik sivisussuseqassaaq, taamaattumillu qinnuteqaateqarsimasut naammagittarallartariaqassapput, Pinngortitaleriffiup pisortaa, Klaus Nygaard, oqarpoq.
