Kalaallit Nunaat pillugu Danmarkimi ataatsimeersuartitsineq soqutigineqarluartoq

Dansk Industrip nunarput pillugu ataatsimeersuartitsinerani inuit 250-init amerlanerusut peqataapput - aatsaallu taama soqutiginnittoqartigaaq.
Dansk Industrip illorsuaq Københavnipqeqqaniittoq ataatsimeersuarfiuvoq. Erfalasorput ullormi tassani Illorsuup igaani ersippoq. Assi © : Dansk Industri
decembarip 05-at 2019 18:36

Dansk Industrip aaqqissuussaanik nunarput pillugu Københavnimi ataatsimeersuarnermut piginneqatigiiffinni nunani allaneersuneersut politikerillu takkupput. Ataatsimeersuarneq aningaasaliisartunik nunani allaneersunik soqutiginnilersitsiniarfiuvoq.

Siornatigornit soqutiginnittoqarnerusoq, Dansk Industrimi siunnersorti Mads Qvist Frederiksen naliliivoq.

- Aatsitassarsiornissaq siornatigut soqutigineqarnerusarpoq, aammali allanut, soorlu attaveqatigiinnermut atortulersuutinut takornariartitsinermullu soqutiginnittoqartoq takusinnaavarput. Taamaammanuna Kalaallit Nunaat pillugu ataatsimeersuartitsisugut, Kalaallit Nunaanni inuussutissarsiornermi periarfissat oqaluttuariumallugit, Mads Qvist Frederiksen oqarpoq.

Aatsitassat periarfissaalluartut 

Kalaallit Nunaat aalisagaannarnut tunnganngitsoq oqariartuutinut ilaavoq. Aatsitassarsiornissaq periarfissarsuarnut ilaavoq.

Nunatsinni maanna marlunni aatsitassarsiortoqarpoq, piginneqatigiiffippasuilli nunatsinni nunap ilua misissorpaat aatsitassarsiornissamut periarfissarsiorlutik.

aatsitassarsiortunillumi ataatsimeersuarnermut takkuttoqarpoq, taakkunani AEX Gold, Nalunamik ammaaqqinnissamik pilersaarutilik akuuvoq.

Aamma Kinamiut Shenghe Resources takkupput. Taakkua Greenland Mineralsimut, Kuannersuarni, saffiugassanik qaqutigoortunik piaaffinni nunarsuarmi annerpaanngorsinnaasumik suliniuteqartumut aningasaliisunut pingaarnerpaapput.

Aamma professor Minik Rosing, Greenland Venturemiit Karsten Høy, Kalaallit Airportsip siulersuisuisa siulittaasuat, Jóhannes Egholm Hansen taavalu Folketingimut ilaasortat Chemnitz Larsen (IA) aamma Aki-Matilda Høegh-Dam (S) peqataapput.