Kalaallit Nunaat peqqissusermut ilisimatusarfittaarpoq

Kalaallit Nunaat nammineq aqutassaminik peqqissusermut ilisimatusarfittaarpoq, taannalu taaguuteqartinneqarpoq Kalaallit Nunaanni Peqqissusermik Ilisimatusarfik, taanna maannakkuugallartoq Peqqissaanermik Ilinniarfimmi Nuummiittumi inissisimagallassaaq.
oktobarip 20-at 2008 06:35

Nunatsinni taamatut ilisimatusarfiliornikkut siunertaavoq, ilisimatusarnikkut paasisat Kalaallit Nunaanni nunaqavissunut iluaqutaasarnissaat aamma misilittagaqartoqalernissaa.

Ilisimatusarnikkut misissuisartussaq ataaseq, taassumalu ikiortissai ilisimatusartutut ilinniartut marluk Peqqissusermik Ilisimatusarfittaami maannakkuugallartoq sulisorineqarput. Taamatuttaaq ilisimatuut avataaneersut isumaqatigiissuteqarnikkut sulisussarsiarineqarsinnaapput – ungasinnerusormi eqqarsaatigalugu isumaavoq suliffik ilisimatusarfiullunilu atuartitsiviussasoq.

Ilisimatusarfimmi pisortatut inissinneqarpoq Issittumi peqqissutsimut ilisimatooq Peter Bjerregaard siulersuisunilu siulittaasunngorluni nakorsaaneq Karin Ladefoged.