Kalaallit Nunaat nutaaliaasoq
Kalaallit qallunaallu illussanik titartaasartut suleqatigiillutik Kalaallit Nunaat siunissami qanoq isikkoqassanersoq pillugu siunnersuuteqarfigissavaat.
Future Greenlandip inernera 2012-mi nunat tamalaat akornanni 13-issaannik Venedig-mi illussanik titartaasarnermik saqqummersitsinermi qallunaat ilanngussaattut saqqummersinneqassapput.
Illussanik titartaasartut aningaasaateqarfimmiit Statens Kunstfondi-miit, Dansk Ariktektur Center-miit kiisalu saqqummersitsinermi aqutsisuusumit ilisimatuumit Minik Rosing-mit, toqqarneqassapput.
Kalaallit Nunaanni aningaasaqarnikkut, inuiaqatigiittut imminut napatissinnaasumik siumut isiginnittunik ineriartortitsisinnaaneranut tunngassutilimmik titartaasartut suliassinneqassapput. Tamanna pissaaq ilaatigut Kalaallit Nunaanni kommunit sisamaasut suleqatigalugit.
- Suliniutinni takorluugaraara, Kalaallit Nunaat nutaaliaasoq kulturikkut oqaluttuarisaanikkullu annertuumik oqaluttuassartallip, nunarsuarmioqataanermilu neqerooruterpassuaqartup takutinneqarnissaa, Minik Rosing oqarpoq.
Kalaallit illussanik titartaasartut toqqarneqarsimasut tassaapput; TNT Nuuk, Kitaa Arkitekter, Tegnestuen Nuuk, Clement og Carlsen Arkitekter, Qarsoq aamma Thomas Riis, Danmarkimiit toqqarneqartut tassaallutik; BIG aamma superflex, David Garcia Studio Henning Larsen Architects, Elkjær og Ebbeskov kiisalu Hausenberg.