Kalaallit Nunaat namminiilivinnissaanut piareersalereerput
Namminersornerullutik Oqartussat Inatsisartut ippassaq ualikkut kaammattorpaat, europamiut aalajangersagaat atsioqqullugu, inuit nunamiit sorlermeersuunersut paatsuungassutaaleqqunagu.
Kalaallit Nunaat immikkut naalagaaffinngussagaluarpat,
tassa Danmarkimiit avissaarluni, taava inuit naalagaaffimmi sorlermi innuttaanersut paatsuungassutigineqassanngilaq, soorlu Sovjetunioniusimasoq naalagaaffippaalunnut aggorluni atorunnaarsinneqarmat, Baltikummimi russit ikinnerussuteqartut innuttaaffissaminnik naalagaaffissaarummata.
Kalaallit Nunaalli Danmarkimiit avissaassagaluarpat taama pisoqarnavianngikkaluarpoq, tassami taamanikkussamut kikkulluunniit Kalaallit Nunaanni innuttaasinnaanngitsut tamarmik Danmarkimi innuttaalersinnaanerat Danmarkimiit maannangaaq qulakeerneqareermat. Island 1918-imi namminersulivimmat periuseq tamanna aamma atorneqarpoq. Taassuma saniatigut inuit tamarmik sumi innuttaarusunnerlutik aalajangertussaavaat.
Inatsisartuni pineqartup siullermeerluni oqallisigineqarnerani Demokraatit oqarput inuit ilaasa marloqiusamik innuttaaffeqarsinnaanissaat ammaffigineqartariaqartoq, uani eqqarsaatigineqarlutik meeqqat qallunaamik kalaallimillu angajoqqaallit, soorlu meeqqat kalaallinik angajoqqaallit Danmarkimili inunngorsimasut. Inatsisartut inatsisiliornermut ataatsimiititaliaata ilaatigut tamakku sukumiisumik maanna eqqartortussanngorpai.
