Kalaallit Nunaat namminersulersoq takutitsilluarpoq
Julie Berthelsenip piumassuseqarluarnermigut qallunaat tv-kkut isiginnaartartut, kalaallit meeqqanut erinarsuutaanik, uaajeernermik, qilaatersornermik Zikazakkullu erinarsugaat "Silarsuaq takuiuk" atorlugit tiguaalluarmat, taassuma nersualaarpaa.
Aamma erinarsoqatigiit katitigaanerat Kirsten Thistedip nersualaarpaa. Taannami isumaqarpoq kalaallit ullutsinni nunarsuarmioqataanerannut ersersitsisuusoq.
Erinarsoqatigiinnut peqataasut ilarpassui kalaalerpalunngilluinnarput, ilaatigut allappoq.
Taamaattorli misigissutsit kikkunnullu ilaasutut misigisimaneq pingaarnerupput. Aammami Julia erinarsortussarsiorami "kalaallinik" peqataasussarsiorani inunnik Nunatsinnut attuumassuteqartunik peqataasussarsiorpoq.
Taamaalilluni erinarsoqatigiit assigiinngitsorujussuarnik tunulequtallit peqataatinneqarput. Ilaat kalaaliviupput, ilaat kalaallimik aanaqqeeqarput, ataaseq ilinniartitsisuuvoq, ukiuni arfinilinni Nuummi najugaqarsimasoq, ataaseq kalaallinik angajoqqaalik Danmarkimi inunngorsimasoq, ataaseq Amerikamiunik angajoqqaalik Kalaallit Nunaanni inunngorsimasoq, kalaallisut atilik. Ilaat kalaallisut oqallorissorujussuit, ilaalli kalaallisut oqalussinnaanngitsut.
Kalaallit ullutsinneersut tassa taamaattuupput: Oqaatsit kulturillu assigiinngiiaartorujussuullutik, Kirsten Thisted allappoq.
- Kalaallit Nunaat nutaaliaasoq Juliap ersersinniarsimavaa - tamannalu iluatsilluarlugu. Erinarsoqatigiit ersersippaat tassaallutik kalaallit inuusuttut ataatsimoortut anguniakkaminnillu nalornisaqanngitsut, tv-kkut assilineqarnissaminnut qununngitsut nalorninaatsumillu oqaatiginiarpaat, kinaanertik sumunnarniarnertillu ilisimagamikkit.
Namminersorneq Julie AllStarsikkunnit takutilluarneqarpoq, aamma naalakkersuinerup avataatigut, Kirsten Thistedip Politikenimi allaaserisani taama naggaserpaa.