Kalaallit Nunaat Mordoriunngilaq
Nunatta avataanit isigineqarneranut tamanna periarfissatsialaasoq, Nunarpulli ajunngitsumik aatsaat takutinniarneqassappat tamanna periarfissatsialaasoq, Nunatsinni takornarnialerisut Visit Greenlandip pisortaata Anders Stenbakkenip oqaatigaa.
Nunatsinni pinngortitarsuaq ilaatigut pikkunanaarneqarsinnaasoq, "Ice Cold Gold"-ip aallakaatinneqaqqaarnerani takutinneqarpoq, tamannalu Nunatsinnut iluaqutaanavianngitsoq, Anders Stenbakkenip oqaatigaa, isiginnaagassialli aallakaatinneqarnera ukiup aappassani nanginneqarpat Nunatta allatut, pitsaanerusumillu, takutinniarneqarniarmat tamanna iluaqutaaginnassasoq, Anders Stenbakkenip aamma oqaatigaa:
- Kalaallit Nunaanni pinngortitarsuaq ulorianarsinnaasutut aallaqqaammut takutinneqarpoq, nuna aatsitassarsiorfigissallugu ulorianarsinnaasoq takutinneqarluni, taamaariarlunili ulorianarpallaanngitsutut aamma takutinneqarpoq, tamannalu soqutiginarpoq, Visit Greenlandip pisortaa Anders Stenbakken oqarpoq.
Kalaallit Nunaat pillugu filmiliorniat ukiut ingerlanerini amerlasimaqisut, taassuma oqaatigaa, Nunatta isiginiarneqarneranik ilaatigut innarliisimaqalutik. "Ice Cold Gold"-imilli taallugu isiginnaagassiap Nunatsinnut iluaqutaasinnaanissaa, Stenbakkenip oqaatigaa:
- Kalaallit Nunaata inissaqarluarnera, periarfissanillu ulikkaarnera, Nunatta periarfissaq una atorlugu takutissinnaavaa. Uloriananngitsuunerali aamma takutinniarneqarsinnaavoq, assersuutigalugu Brugsenimut pisiniariartornerup ulorianartuunnginnera takutinneqarsinnaalluni, Visit Greenlandip pisortaa Anders Stenbakken oqarpoq.
"Ice Cold Gold" aallakaatinneqaqqaarmat sila taamanikkut ajoqattaarpoq, TV-kkulli isiginnaagassiap ukiup aappassaani aallakaatinneqarnissaani silap ajunnginnerunera, Nunatta avataanit ajunnginnerusumik aamma isiginiarneqarnissaa qularnanngitsoq, Anders Stenbakkenip oqaatigaa.
