Kalaallit Nunaat Londonimi

Kalaallit Nunaata tulunnut nittarsaassinnera Londonimi Hellenic Centerimi ullaaq ammarneqarpoq.

Qajaq, ukkusissamik kusanartuliat, assit nunatsinneersut, nanoq kiffiugaq 3 meeteringajassuaq iluliaminerlu ilaatigut takusarneqarsinnaapput.

Mads Nordlund Greenland Tourismimeersoq ilisimatitsivoq tusagassiortut niuernermillu suliaqartut 30-it ullo’qeqqasiornermi naapeqatigiinneqassasut. Angalatitseqatigiiffiit ilaatigullu niuertarfissuaatilik Mark and Spencer allat 70-it missaanniittut peqatigalugit unnugu aamma naapeqatigiittoqassaaq, Kalaallit Nunaata pissarititaanik nerisassianik tamuluutigaqarfiusussami.

Air Greenland Londonimit Københavnikkoorluni Kangerlussuarmut timmisartuussinermik ammaaniarpoq.

- Tuluit Kalaallit Nunaannut takornariartartut ikittuararsuupput, taamaattumik attaveqaatissarsiorpugut, Air Greenlandimi tuniniaanermut pisortaq Per Karlsmose radioavisimut oqarpoq.

Royal Greenland, KNI, Greenland Tourism Air Greenlandilu Namminersornerullutik Oqartussat suleqatigalugit Kalaallit Nunaata Londonimi nittarsaanneqarneranik isumaginnittuupput.