Kalaallit Nunaat isumassarsiorfigalugu Frankrigimiut eqqumiitsuliaannik Katuami saqqummersitsineq

Saqqummersitsineq Frankrigimiut Aallartitaqarfiat aamma Frankrig pillugu institutti qanittumik suleqatigalugit aaqqissuunneqarpoq. Saqqummersitsinermut atatillugu aaqqissuisut filmimik "The artist"-imik akeqanngitsumik isiginnaarnissamut qaaqqussipput. Tamanna decembarip qulingiluaani nal. 17.00 inersuaaqqami pissaaq.

-Kalaallit Nunaannut tikeqqaarama, allaanngilaq sinnattuinnarlunga. Sooq qanorlu innera nassuiarsinnaanngilara. Frankrigimi suut tamaasa uatsinnut qanoq ajornanngitsiginersut puigortarlugu pinngortitallu nukimmik pigisaata puigortarnera paasivara. Maani Kalaallit Nunaanni inuuneq pinngortitamit aqunneqarpoq. Sussanersutit sussannginnersutillu aalajangertarpaa, Isabelle Vasseur knr.gl-imut oqaluttuarpoq.

Frankrigimiu qalipaasoq qalipaasarnermi saniatigut nunagisamini inunnik atugarliortunik sullissisuuvoq inuunerminilu nukissamik pissarsiniarluni qalipaasarluni. Nukik taanna Kalaallit Nunaanni nassaassaalluarpoq Isabelle Vasseurilu Nunatsinniikkaangami nukissaminik katersilluartarpoq.

- Qalipaasutut paasivara qalipaatit Kalaallit Nunaannut pingaaruteqanngitsut. Frankrigimi qalipaatit tamaasa takuneq-ajorpagut, inuuneq suunersoq puigorsimagatsigu. Saqqummersitsinermi uani nunamut innuttaasuinullu qanoq ataqqinnitsiginerlungalu nuannarisaqartiginera inuiannut kalaallinut takutinniarpara, Isabelle Vasseur ukiuni 35-ini qalipaasarsimasoq oqarpoq.

Saqqummersitsineq Katuami decembarip 20-iata tungaanut takuniarneqarsinnaavoq.