Kalaallit Nunaat isumaqatigiissuteqarnissamut utaqqiinnalerpoq
Naak isumaqatigiissutissaq suli inissinneqarsimanngitsutut Kuupik Kleistimit oqaatigineqaraluartoq taamaattoq silap pissusaa pillugu illutungeriit marloqiusamik isumaqatigiissusiorsinnaasimapput.
-Nunat tamalaat akornanni isumaqatigiissutissaq naammassineqarpat paasinarsissaaq Kalaallit Nunaannit isumaqatigiissutissaq sorleq atorneqassanersoq, Kuupik Kleistilli oqaatigiumanngilaa Kalaallit Nunaannit piumasaqaatit sorliit akuerineqarsimanersut.
Silap pissusaa pillugu ataatsimeersuarnermi siulittaasoq, Lykke Friis oqarpoq, Kalaallit Nunaata Danmarkillu akornanni isumaqatiginniarnerit naammagisimaarlugit.
Kalaallit Nunaata CO2-mik mingutsitsinini 2020 tikitsingu 5 procentimik appartinniarlugu pisortatigoortumik oqariartuutigereerpaa.
- Silap pissusaa pillugu nunat tamalaani isumaqatiginniarnerni Kalaallit Nunaat toqqaannartumik sunniuteqarsinnaanngilaq, taamaakkaluartoq marloqiusamik isumaqatigiissusiornitsinnut atatillugu aqagu unnukkut
isumaqatigiissut inissinneqarnissaannut isumaqarpunga nuannaarutissaqartugut, Kuupik Kleist Lykke Friisimik ataatsimeeqateqaqqammersoq KNR-imut oqarpoq.
