Kalaallit Nunaat internetikkut nittarsaanneqassaaq
Nunarsuatsinni takornariat ussassaariffigalugit unammillernerup sakkortusigaluttuinnarnerata kingunerisaanik, NATA, North Atlantic Tourism Association, unammisitsivoq Savalimmiut, Islandip nunattalu ataatsimoorussamik avammut takoqqusaarutiginissaannut.
Takkoqqusaarisarfiit toqqakkat pingasut unammisinneqarmata, TBWA toqqarneqarpoq, tassalu taassuma nunanut avannarlernut takornariat amerlanerulersinniartussanngorpai.
Internetikkut ussassaarusiorneq nunarsuarmi atorneqaraluttuinnartoq sakkutut pingaarnerpaatut TBWA-p atorniarpaa.
- Anguniarneqartoq tassaavoq nunat avannarliit nunarsuarmioqatitsinnit ilisarineqarnerunissaat, internetikkut pisariitsuaqqamik pinnguartutut ilikkagaqarnikkut, North Atlantic Tourism Association, NATA tusagassiuutitigut nalunaaruteqarpoq.
TBWA-p takoqqusaarusiassaa Islandimi Vestnorden Travel Mart-eqalerpat septembarip qiteqqunnerani takuneqarsinnaassaaq.
