Kalaallit Nunaat ilumut namminersulivissava

juunip 16-at 2007 13:28

Namminersorneq pillugu inatsisissaq nunatsinni partiit, namminersorneq pillugu isumalioqatigiissitani ilaasortaatitaqartut, tamarmik iluarisimaaqaat.

Partiit naalakkersuisuutitaqartut illuatungiliuttullu kiisami allorassaaqatigiillutik ataatsimik anguniagaqartut.

Namminersorneq pillugu inatsisissatut siunnersuummi ilaavoq, inuiaat kalaallit namminersulivinnissaq pillugu aalajangiisinnaasut. Kisianni nunarput ilumut namminersulivissava, taamaassappallu qaqugu? Apeqqummi tassani isumaqatigiinneq unippoq. Augusta Salling Kuupik Kleist-ilu ima oqarput:

-Suleqatigiinneq inuiaqatigiinnut pitsaasumik kinguneqarsinnaappat, taava isumaqarpunga nunatta taanna qinerumaaraa. Taamaattumik suliatta uuma annertuup– aamma uanga isumaqataavunga – nunatsinnut pitsaasumik kinguneqartussap – naammassineqarnissaa soqutigigutsigu, taava putusaarinissamik pissutissaqanngilagut. Uani siunertarineqanngilaq Danmarkiminngaaniit avissaarnissaq, taamaallaalliuna kalaallit nammineerlutik qaquguugaluarnerpoq perusulissagunik periarfissaat ammarneqartoq, Augusta Salling oqarpoq.

- Qularutigineqassanngilaq namminersulivinnissaq siunertarigatsigu, Inuit Ataqatigiit sinnerlugit taama oqarsinnaavunga. Kisianni ulloq taanna namminersorneq pillugu inatsisissap atuutilerneraninngaaniit, piffissaq piareersarnermut allamut assigiinngitsorpassuartigut atorneqassaaq, Kuupik Kleist oqarpoq.

Namminersornissaq namminersulivinnerluunniit pillugit oqallinneq tamaat Itisiliinermi, nalunaaqutaq arfinermut aallakaatinneqartussami, tusarnaarneqarsinnaavoq.