Kalaallit Nunaat ilisimatinneqarsimanngilaq
CIA-p, taamatullu USA-p timmisartui parnaarussassanik ilaasullit, 2004-imiit nunatsinnut aqqusaartarsimanerannik ilimatsaassaqarnermi, Kalaallit Nunaanni oqartussat ilisimatinneqartarsimanngillat, taamani nunatsinni nunanut allanut pissutsinut Naalakkersuisuusoq, Josef Motzfeldt oqarpoq. Taamaattumillu ilimatsaassaqarneq nutaarsiassani eqqartorneqalermat, Josef Motzfeldt, taamani danskit nunanut allanut ministeriannut, Per Stig Møllerimut allagaqarpoq, paasiniarlugu tamanna ilumoornersoq:
- Taamanikkullu allagaqarpunga, tamanna inuit pisinnaatitaaffiinik aammalu nunatta silaannartaa taamatut atorneqartarsimappat unioqqutinnerummat, piaarnerpaamik amerikamiunut kalerriutigeqqullugu tamanna Kalaallit Nunaata akuersaarsinnaanngikkaa.
Josef Motzfeldt novembarimi 2005-imi allagaqarpoq. Qaammatit marluk qaangiummata, tassa januaarimi 2006-imi, Per Stig Møller akissuteqarluni allappoq, tamanna danskit naalakkersuisuisa ilisimasaqarfiginngikkaat.
Københavnip Universitetiani inatsisinut professori, Hanne Petersen, ippassaq KNR-imut oqarpoq, USA-p, Danmarkip aamma Kalaallit Nunaata illersornissaq pillugu isumaqatigiissutip nutarsarnerani, Igalikumi 2004-imi pisumi, atsioqatigiinnerup nalaani, Kalaallit Nunaata ilisimasimassagaa tigusanik parnaarussassanik amerikamiut timmisartuussisarneri.
Tamannali Josef Motzfeldtip ilisimaqarfiginagu oqarpoq:
- 2004-imi Colin Powell tusagassiortunit apersorneqarmat, nunanut allanut pisortaqarfiup apeqqut taanna, ilumut eqqaaneqarsimanersoq suliassamisut ilanngussimanngilaa. Atsaalli novembarimi 2005-imi Per Stig Møllerimut allagaqarpunga, tusagassiutinit pasitsaanneqarmat nunatta silaannartaa taamatut atorneqarsimasut allaaseralugit, Josef Motzfeldt taama oqarpoq.
Ulloq manna tikillugu danskit naalakkersuisuisa pisoq kikkunnulluunniit uppernarsarsinnaanagu aalajangiusseqqapput. Nunatsinni oqartussat danskit naalakkersuisuinit eqqunngitsumik paasitinneqartarsimappata tamanna toqqissisimananngitsoq, Josef Motzfeldt oqarpoq:
- Tamanna toqqissisimananngilaq aamma tatigeqatigiinnermi suleqatigiinnermillu tunngasutigut iluaqutaagaarnaviarani, danskit naalakkersuisui piumasaarsortutut isikkulimmik uagutsinnut saqqummiussisarsimappata, Josef Motzfeldt taama naggasiivoq.
