Kalaallit Nunaat hashimut naaggaarpoq
- Juunip ulluisa 26-anni hashimut naaggaarnerput takutinniarlugu angalaaqatigiissaagut. Taamaaliorneq ersarissumik isummernermik hashimut akiuiniarnermi ataatsimuussutitsinnik immitsinnullu soqutiginninnitsinnik takutitsivoq. Innuttaaqatigut hashimik atornerluisuusut ataqqinnilluta assatsinnillu isaassivigalugit naapissavagut.
Peqqissutsimut Naalakkersuisoq Agathe Fontain Nuummi akerliussutsimik takutitsinermi siuttuusussaq taama oqarpoq, nangillunilu:
- Meeqqat inuusuttullu akornanni atornerluinerup annertusiartornera pingaarnertut ernumassutigaara. Hashimik atuinerup inuiaqatigiittut akuerinnginnitta inuusuttunut ersarissumik oqariartuutiginissaa pingaaruteqarpoq. Innuttaasut amerlasuut nunatsinni sumiiffinni assigiinngitsuni akerliussutsimik takutitsinernut peqataanikkut tapersersuinerminnik takutitsinissaat neriuutigaara. Peqatigiilluta hashimik ajornartorsiuteqarneq iliuuseqarfigisinnaavarput, Agathe Fontain tusagassiuutinut nalunaarummi taama allappoq.
AAMMA ATUARUK Ilulissani hashimik tuniniaanermi arlallit pasineqartut
Meeqqat inuusuttullu hashimik misiliisimasut hashimilluunniit pujortartartut amerlisimanerat innuttaasut peqqissusaannik misissuisitsinerup kingulliup 2014-imeersup takutippaa.
15-inik ukiullit 19%-ii hashimik pujortarneq 2006-imi misilissimavaat hashimillu pujortarnermik misiliisimasut 23%-imut 2014-imi amerleriarsimapput.
Pingaartumik angutit inuusuttut 18-iniit 24-nut ukiullit akuttunngitsumik hashimik pujortartarnerarput.
Naapeqatigiinneq Nuummi Pisiffik Nuussuup silataani nalunaaqutaq 15:00 aallartissasoq, Fontain paasissutissiivoq.
Naqqiut: Allakkaluarparput 15-inik ukiullit 17%-ii hashimik pujortarneq 2006-imi misilissimavaat hashimillu pujortarnermik misiliisimasut 26%-imut 2014-imi amerleriarsimasut. Kukkunerput ajuusaarutigaarput.
AAMMA ATUARUK Haship akiorniarneqarnera annertusaqqikkusukkaa
AAMMA ATUARUK Ilulissani innuttaasut hashi akiorniarusuppaat
