Kalaallit Nunaat CIA-mut pingaaruteqarsimaqaaq
CIA ukiorpassuarni peqqarniisaarniartutut pasisanik qimarngussisarsimavoq taakkualu nunani assigiinngitsuni parnaarussivinnut timmisartuuttarlugit, parnaarussallu arlaleriarluni uppernarsarneqartartutut naalliutsinneqartarsimallutik.
Unnugu DR-imi piviusulersaarusiami aammattaaq KNR-imi takutinneqartussami kilitsissiaqarfiup CIA-p timmisartuata Kalaallit Nunaannut akunnissimanera arlaleriarlunilu Danmarkimik qulaatsisarsimanera qulaarneqarpoq. Tamanna ministeriunerup nunanullu allanut ministerip sumilluunniit ilisimasaqarfiginngilaat.
Danskit naalakkersuisuisa kilitsissiaqarfiup CIA-p unioqqutitsisumik iliuuserisimasaanut danskiniluunniit atorfilittat oqartussaasulluunniit akuliussimanerat ilisimasaqarfiginngilaat.
Danmarkip silaannartaata nunat tamalaat isumaqatigiissutaat unioqqutillugu timmisartorfiusarnera ilisimasaqarfiginngilarput.
Qinersinissaq sioqqullugu silaannartaata kilitsissiaqarfimmit CIA-mit timmisartorfiusarsimanera Folketingimi arlaleriarluni oqallisigisassanngortinneqartaraluarpoq, ministeriunerulli danskit naalakkersuisuisa Danmarkip Kalaallit Nunaataluunniit silaannartaata narrunarsagaanera timmisartorfiusarsimaneranik ilisimasaqarnersut tamatigut akueriumasarsimanagu.
Danskit naalakkersuisuisa parnaarussanik unioqqutitsisumik angallassilluni timmisartuussisarneragaanernut paasissutissat pigisavut tamaasa saqqummersimavavut.
- Maannali uppernarsineqarput.
- Danskit naalakkersuisuinuunngitsoq, ministeriuneq akivoq.
Nutaamilli paasissutissat tunngavigalugit naalakkersuisuni illuatungiliuttut suliassap suliarineqaqqilernissaa kissaatigaat Amerikamilu naalakkersuisut erseqqissumik akissuteqarnissaat piumasaqaatigalugu.
Siusinnerusukkut nunanut allanut ministeriusimasoq Socialdemokratineersoq Mogens Lykketoft isumaqarpoq massakkut danskit naalakkersuisuisa piumasaqaatip itigartinnissaanut tamatumuuna ajornartorsiussasut.
- Danmarkip oqartussaaffigisaani Kalaallit Nunaanni timmisartumik akunnittoqartarsimappat tamanna danskit naalakkersuisuisa qanoq iliortoqartarsimanera pillugu arlaatigut ilisimasaqarsimanissaat ilimagineqartariaqarpoq, tamannalu ajornartorsiuterujussuarmut imaannaanngitsorujussuarmullu, tassalu nunat killiit arlallit piumassutsiminnik piumassuerinngisaminnillu taamatut pilersaaruteqartoqarsimaneranut tassunga inatsisit isumannaatsuunissaannik, inatsisillu inissisimanerisa isumannaatsuunissaannik inuillu pisinnaatitaaffiinik ataqqinninnissamik unioqqutitsilluni narrunarsaanermut tapersersuisimassappata, Mogens Lykketoft oqarpoq.
Lykketoftip oqarnera naapertorlugu aalajangiivigisassatut siunnersuutip saqqummiuteqqinnissaa pineqalersinnaavoq, tassanilu danskit naalakkersuisui misissuinermik aallartitsinissaannik peqquneqassallutik.
- Illuatungiliuttut tamarmik Folketingimut qinersinissaq sioqqullugu kilitsissiaqarfiup CIA-p isertortumik timmisartuussisarneri pillugit aalajangiivigisassatut siunnersuuteqarput.
Det Radikale Venstre, SF aamma Enhedslistenip misissuisoqarnissaanik siunnersuut tapersersorpaat. Ny Alliance apeqqut pillugu suli isumminngilaq.
