Kalaallit Nunaat Canadalu ilisimatuussutsikkut suleqatigiinnerulerput

Kalaallit Nunaanni Silamik Misissuisoqarfik Canadamiunik qanittumik suleqateqalerpoq.
maajip 17-at 2010 16:28

Kalaallit Nunaanni Silamik Misissuisoqarfiup pisortaa professor Søren Rysgaard kalaallit-danskit-canadamiut silamik misissuinikkut suleqatigiinneranni annertuumi siuttuusussanngorpoq. Canadami tamarmi qinnuteqartut 135-t akornanni aqutsisussat 20-it toqqarneqarput. Siuttuuffissat taakku ilaat - Canada Excellence Research Chair (CERC) Issittup nunataani uumasuaqqat aamma Silap Allanngornera pillugu misissuinermut tunngasoq - Søren Rysgaardimut aamma University of Manitobamut tunniunneqarpoq.

Kalaallit Nunaanni Silamik Misissuisoqarfiup 2009-imi maajimi pilersinneqarneraniit ingerlarsortoqarsimaqaaq. Ilisimatusaatigalugit misissuinerit 20-it aallarnerneqarsimapput, misissuivik maanna aalajangersimasunik 15-inik sulisoqalerpoq aamma avataaniit sulisunit 80-init (amerlanerit Danmarkimeersut) attuumassuteqarfigineqalerluni. Suleqatigiinnissamik isumaqatigiissuteqarnikkut silarsuarmi Issittumi silap misissuiffigineqarnerani ilisimatuut siuarsimanerit qasseersuit ataatsimut katersorneqarput. Canadamiut suliaanaalluunniit 2011-2018-imi millioninik untritilikkaanik suleqatigiinnermut ilanngussiffiupput.

Pinngortitaleriffiup illu ilassut 2010-ip ingerlanerani ammartussaammagu sulianut amerliartuinnartunut inissaqalissaaq. Aammattaaq Canadami allaffiit, misissuisarfiit tankillu sikumik misissuiffiit, illup iluani suut tamaasa malinnaavigeqqissaarlugit immap sikuliorfiusinnaasut sanaartorneqaleruttorput. Canadami misissuiffiup ilisimatuussutsikkut misissuisut 80-it missaat suliffissaqartissavai. Suleqatigiinnermi nutaamissaaq ilinniartitaaneq assut pingaartinneqarpoq aammalu PhD-inngorniuteqartut 30-it missaat misissuiffimmut attuumassuteqassallutik.