Kalaallit Nunaat Bruxellesimi ataatsimiititsinerat peqataaffigineqarluarpoq
EU-p Kommissioniani sulisut, sinniisuutitaqarfinneersut, aallartitaqarfinneersut isumaqatissarsiortartullu 60-it missaanniittut peqataapput.
Kuupik Kleistip oqalugiaammini erseqqissaarpaa EU-p nunat issittut qaninnerusumik suleqatigiilernissaq ammaffigalugu. Piumasarineqarporli suleqatigiinneq attaqqeqatigiinnermik imminullu iluaqutigeeqatigisinnaasumillu pissasoq nunat issittut suleqatigerinerinilu qangali inooriaaseq ataqqillugu pissasoq, tassunga atatillugu pinngortitap iluaqutissaanik atajuarsinnaasumik atuineq.
Imarsiornermut Aalisarnermullu Pisortaqarfimmi Pisortaq Reinhard Priebe, EU-p issittunut tunngasunut isumaliuutersuutaa pillugu nalunaaruteqarpoq massakkut Sverige EU-mi siulittaasuutitaqartuusup issittoq pillugu nalunaarutip Rådimi inerniliineranik piareersaavoq.
- EU-p Arferit puisillu amiinut tunngasunik politikkianut isummassi sakkortuut paasivakka. Raajallu avammut nioqqutaaneri pillugit oqaloqatigiinnerit nalunngereerpakka. Sammisassat uku ammasumik oqallisigiuassavagut, Reinhard Priebe oqarpoq.
Isumasioqatigiinnermi Namminersorluni Oqartussaaffeqarneq, EU-p issittoq pillugu isumaliuutersuutaani nunat inoqqaavi, Kalaallit Nunaani aningaasaliineq, uulianik gassinillu ujaasineq, Kalaallit Nunaani ajunaalernermi sillimaneq eqqartorneqarputtaaq.
Naalakkersuisup Siulittaasuata Kuupik Kleistip Bruxellesimiitilluni EU’p Imarsiornermut Aalisarnermullu Kommissæriat Joe Borg, Sverigip EU-mi aallartitaata tullersortaa Jan Olsen, EU-imilu Inatsisartut siulittaasuata tullia Diana Wallis aamma ataatsimeeqatigai.