Kalaallit Nunaat Bolivialu kulturikkut paarlaateqatigiissapput

Kalaallit eqqumiitsuliortut arfinillit Amerikami Kujallermi Boliviami kulturikkut aappaagu februaarip qaammataani paarlaasseqatigiissapput. Kulturikkut paarlaasseqatigiinnissamik isumaqatigiissut Nunatsinni Kulturikkut Illorsuarmi, Katuami, ualimut atsiorneqarpoq.

Eqqumiitsuliortut Aka Høegh, Ivars Silis aamma Rasmus Lyberth Qaqortumi katersugaasivik suleqatigalugu Mexicop Kalaallit Nunaatalu akornanni kulturikkut paarlaasseqatigiinnissamik ukioq 2002-imi isumassarsipput, tamannalumi iluatsilluartumik piviusunngorpoq. Eqqumiitsuliortut taakku pingasut Katuaq aamma Nunanik Ineriartortunik Kulturikkut paarlaasseqatigiisitsisarnermik sullissivik, DCD, suleqatigalugu assingusumik maanna aaqqissuussinialerput.

Boliviami innuttaasut indianeriusut kalaallinik nipilersortartunik, erinarsortartunik, eqqumiitsuliortunik assiliisartunillu naapitsinissaminnut aappaagu februaarimi periarfissarsissapput, uvaajeerneq mininnagu.

Nunatsinneersut Boliviamut angalanissaat 300.000 koruuninik akeqartussatut nalilerneqarpoq, taakkunanngalu Nunanik Ineriartortunik Kulturikkut paarlaasseqatigiisitsinermik sullissivik, CKU, 220.000 koruuninik tapiissaaq.

Suliniut CKU-p tapersersorpaa, erinarsorneq nipilersornerlu kisimik kulturikkut paarlaasseqatigiinnermi sammineqartariaqanngimmata.

Peqataasussat tassaagallarput Aka Høegh, Rasmus Lyberth, Ivars Silis, Karina Møller, Bendo Schmidt aamma Peter Kristensen.