Kalaallit Nunaat aningaasanik annaasaqarnavianngilaq

- Silap pissusaata allanngoriartornerata nunanut issittunut sunniuteqangaatsiarnissaa qularutiginngilara, Kalaallit Nunaannili aningaasarsiorneq imatorsuaq eqqorneqarnavianngilaq, Pinngortitaq pillugu nunarsuaq tamakkerlugu suliniaqatigiiffiup Danmarkimi siulittaasua, Kim Carstensen, aviisimi Politikenimi issuarneqarpoq.

Immap sikua annikinnerulerpat immakkut assartuineq immaqa ajornannginnerulissaaq, tassa uuliamik qalluinissaq immaqa ajornannginnerulissalluni, Kalaallit Nunaatalu qaqqaqqortunini qaarsoqarluarninilu assut iluaqutigissavaa. Issittunimi allani illut, aqquserngit ikaartarfiillu ajornartorsiutigineqartarput, nuna qeriuaannartuusimasoq aakkiartormat, Kalaallit Nunaannili tamanna ajornartorsiutigineqarnavianngilaq.

Kalaallit Nunaata kujataaniit avannamut isorartunini aamma iluaqutigaa.

- Kujasissumi immap kissarpallaarnera pissutigalugu pingaaruteqaqisut raajat avannamukaartaraluartut suli kilisanneqarsinnaapput, saarulliillu aamma kujasissumiit avannamukaarsinnaallutik, aalisapiluunngikkaannilu suna ajussava, Kim Carstensen oqarpoq.

Aalisakkat aarlerinartorsiorsinnaagaluartut qilalukkat qaqortat qernertallu taavalu aarrit suli piniapilunneqarnerarpai, tamannalu ajornartorsiutaanerusoq, Pinngortitaq pillugu nunarsuaq tamakkerlugu suliniaqatigiiffiup tikkuarpaa.