Kalaallit Nunaat aakkiartorpoq

Imeq 140 milliardi tonsip missaa Kalaallit Nunaanni ukiumut aattarpoq. Nunap nusussisimanninneranik danskit uuttortaanerata tamanna ersersippaa. Sermip immamut aattartup annertussusaa nittaalartarneranit taarserneqartartoq malinnaasinnaajunnaarpoq.

Kalaallit Nunaanni sermeq qanoq annertutigisoq aattarnersoq siullermeerluni uuttorneqarpoq.

Sermersuarmi nittaalartarnerujussua sinerissani sermip aakkiartorneratigut taartaasinnaanersoq ilisimatuut manna tikillugu oqallisigisarpaat. Maannakkut uppernarsineqarpoq, Kalaallit Nunaanni sermip aakkiartornera sukkatsikkiartortoq. Sermeq 70 kubikkilometerip missaannittoq ukioq 2004-mi aappoq, ukiorlu 2007-imi marloriaataa tassa 140 kubikkilometerit missaanniittoq aalluni.

Danmarkimi Rumcenterimi ilisimatuup, Rene Forsbergip, ilisimatooq alla Louise Sørensen, suleqatigalugu qaammataasakkut assilisaannit tamanna erserpoq, taakkua assilisaat Tysklandimi ataatsimeersuarnermi saqqummiunneqaqqammerput.

Sermersiuutut ilisimatooq, Dorthe Dahl Jensen, Københavnimi Niels Bohr Institutimeersoq, oqarpoq, Kalaallit Nunaanni sermip aakkiartupiloornera maanna uppernarsigitsik, tammanalu immap qaffasisissusaanut sunniuteqassasoq.

-Uuttortaanerit assigiinngitsut tamanna qulakkeerpaat. Alloriarneq tulleq tassaassaaq paasiniassallugu sermip qanoq sukkatigisumik aakkiartornera, tamannami immap qaffasissusaanut qanoq sunniuteqassanersoq taamaalilluta siulittuutigisinnaalissavarput, Dorthe Dahl Berlingske Tidendemut oqarpoq.

Sikuiuitsumi Kujallermi sermeq aamma aakkiartorpoq. Rene Forsberg taqqavani aamma misissuiniarpoq.