Kalaallit Nunaannut angalarusuttorpassuaqarpoq

Kalaallit Nunaannut sulinngiffeqarlutik angalarusuttut amerliartuinnarput. Københavnimi Bella Centerimi feriartarneq pillugu sapaatip-akunnerata naanerani takutitsinersuaqarmat, angallatsitsiviit naapertorlugit Kalaallit Nunaannut feriartarneq soqutigineqartorujussuuvoq. Angallatsitsiviit qulit takutsitsinersuarmi peqataapput, angalasarneq pillugu takutitsinersuaq aatsaat taama peqataasoqartigaaq, takutitsisummi 1.000-init amerlanerusimapput.

Bella Centerimi takutitsinersuaq ulluni pingasuni ingerlanneqarmat inuit 45.000-t alakkaasimapput, siornamut naleqqiullutik 1.000-inik ikinnerullutik.

Angalarusuttulligooq imaaginnavissimapput. Neqerooruterpaasuaqarsimavoq, Dankortilugooq atorluarneqaqaaq, Arctic Travel Group aamma Profil Rejser assut inniminniiffigineqarsimallutik.

- Takusaasut angusassamik toraagaqaqaat akikillisaanneqarnertillu iluareqaat. Ullut taakku pingasut ingerlaneranni misigisaqarluaqaagut, Kalaallit Nunaannut Thailandimullu angalaniartut imaaginnavipput, ilaanni ulapittangaaratta malinnaaneq sapilissasoraluta ernumangajavittarpugut, Profil Rejsemi tuniniaanermut siunnersorti, Thomas Nederland oqaluttuarpoq.