Kalaallit Nunaanni silap pissusaata allanngoriartornera EU-mi siulittaasup tuppatigaa
Sila pillugu Københavnimi decembarimi ataatsimeersuarnissami isumaqatiginninniarfiusussani Fredrik Reinholdt pingaarnertut inissisimavoq.
- Nunarsuarput kissarneqarpoq. Kissarnera qaffakkiartorpoq, uagullu qanoq qisuariarnissarput apeqqutaaginnalerpoq, Reinholdt Europami Inatsisartunut ilaasortamut nutaamut, juunimi qinersereernerup kingorna aatsaat ataatsimiittumut ,oqarpoq.
- Naalagaaffikkuutaartumik CO2-mut akileraarsusersuisariaqaraluarpugut, aamarsuit, gassi uulialu atorunnaartariaqarlugit, nukissiuutinillu atuinerput annertuumik millisittariaqarparput nukissamillu atuilluartariaqarpugut, Fredrik Reinfeldt oqarpoq nangillunilu:
- Kalaallit Nunaata sermersua ukiumut 100 kvadratkilometerinit annermik aakkiartorpoq. Kalaallit Nunaanni sermersuup aakkiartornerata imarpissuit meterit marluk tikillugit qaffatsissinnaagaat nalunngilarput. Sunniutissai sakkortussaqaat. Imaq nunarsuatsinni meterimik ataasiinnarmilluunniit qaffappat Asiami inuit 100 millionikkaat qimaasariaqalissapput.
Minnerunngitsumik inuit Bangladeshimiittut, Kinap kangianiittut Vietnamimiittullu, EU-p siulittaasua oqarpoq.
Sverigep EU juulip ulluisa aallaqqaataanni siulittaasuuffigilerpaa, ukiullu naanissaanut siulittaasuutitaqassalluni. Silap pissusaata allanngoriartornera aningaasarliornerlu Sverigep suliassamisut pingaarnertut inississimavai.