Kalaallit Nunaanni qinersivik immaqa ataasiinnaajunnaaqqissaaq
Nunatsinni qinersivik 1998-imi ataasiinnanngortinneqarpoq, inatsisartunulli ilaasortap Kuupik Kleistip, IA-meersup, aqagu siunnersuutigilersaarpaa nunap immikkoortuisa tamarmik inatsisartuni ilaasortaatitaqalernissaannut qinersiviup ataasiinnaajunnaarnissaa.
Nunatsinni qinersivik 1998-imi ataasiinnanngortinneqarmat nunarsuatsinni qinersiviit annersarilerpaat. Siunertaasimavoq sumiiffiit aalajangersimasut pingaarnerutillugit qinikkat sulinnginnissaat.
Allannguinerup kinguneraa inatsisartuni qinikkat nunatta qeqqaneersut amerlanerussuteqalernerat. Ilaasortammi affaat sinnerlugit maanna Nuummeersuupput.
-Allannguisoqarnissaa IA-mit taamani akerleraarput. Inuuniarnermimi atugassarititaasut assigiinngeqaat, taamaattumik pingaartissimavarput nunap immikkoortuisa tamarmik ilaasortaatitaqartariaqarnerat. Imaalluarsinnaavoq qinersiviup ataasiinnanngorneragut ilaasortaatitavut amerleriartut, illoqarfinnimi anginerusuni taaguunneqarnerpaasaratta. Tamannali nuna tamaat isigalugu pingaarnerunngitsoq, Kuupik Kleist oqarpoq.
Namminersorneq pillugu isumalioqatigiissitat atorfilittallu kommunit kattussuunnissaat iluatsillugu qinersiviup arlalinngortinnissaa kissaatiginartippaat. Periarfissaavorli kommunit kattussuutereerpata tamatuma piviusunngortinnissaa.