Kalaallit Nunaanni Politiit: Nuup innaalagialersornissaa Nukissiorfiup isumaginiarsaraa
Ippassarli ataasinngornermi nalunaaqutaq 23 Nuuk innaallagiaqanngilaq.
Kalaallit Nunaanni Politiit nalunaarput, generatorit dieselitortut atorlugit Nukissiorfiit Nuuk innaallagialersorniarsarigaat.
- Nuummi sumiiffiit ataasiakkaarlugit taamaallaat innaallagialersorneqarsinnaapput. Taamaammat maannakkut ilaatigut Nuussuaq innaallagiaqarpoq, politiit allapput.
- Anoraasuarujussuartarneranik erngup nukinganik nukissiorfimmi ajortoortoqarnera qamittoornermik kinguneqarpoq, mannalu tikillugu suli Nukissiorfiit erngup nukinganik nukissiorfimmiit innaallagialersuisinnaanngikkallarput.
- Qaqugu innaallagialersueqqissinnaalernissaq maannakkuugallartoq suli oqaatigineqarsinnaanngilaq.
KNR-ip Nukissiorfiit attaveqarfiginiaraluarpaa, tamannali maannamut suli iluatsinngilaq. Nukissiorfiit pisortaata, Kaspar Mondrupip upalungaarsimanermi suliassani pissutigalugit maannakkut apersorneqarsinnaanani KNR-imut paasissutissiissutigaa. Suliffeqarfiit allat pisoq pillugu KNR-imit oqaaseqatitsiniarneq aamma iluatsinngilaq.
Nukissiorfiit nittartagartik innersuussutigaat, taannali maannakkut ajorpoq. Nukissiorfiilli facebookimi qupperneratigut malinnaasoqarsinnaavoq. Nukissiorfiit facebookikkut quppernerat maannakkut marlunngornermi ullaakkut nalunaaqutaq 6.53 kingullermik nutarterneqarpoq.
Oqarasuaatit angallattakkat attaveqarniarneri aamma nuna tamakkerlugu ajorallarput.
Tusass KNR-imut taamatut nalunaarpoq.
Sumiiffinni ataasiakkaani oqarasuaatit attaveqartarsinnaapput, nunatsinnili tamani oqarasuaatit sunnerneqarput.
Tusass atassuteqaasersuisinnaaleruni inuiaqatigiinni pisariaqartilluinnakkat siulliullugit isumagissamaarpai.
Nalunaaqutaq 10.30-p missaani Tusass nalunaarpoq, politiinut oqarasuaat (normu: 701448) kiisalu peqqinnissaqarfimmut oqarasuaat (normu: 344000) attavigineqarsinnaaleqqittut. Sulili qatserisartut oqarasuaatikkut (normu: 113) attavigineqarsinnaanngillat.
Sakkutuut imarsiortut nalunaarput, VHF-radiot, umiarsuit radioi allallu radiot qaammataasakkut attavillit suli attaveqartut.
Peqqinnissaqarfik napparsimasut pillugit allagaataannut attaveqarsinnaannginnamik unammillernartitsipput, taamaammallu pinartunik saaffiginnissutit kisiisa isumaginiarsarigallarlugit. Taamatut aamma ippoq nakorsaatinut atatillugu.
Politiit qatserisartullu Nuussuarmi, Nuummi Qinngutsinnilu alaatsinaallutik angalapput. Taakkua arlaat atorfissaqartinneqalissappata, aqqusinermiit aalaterilluni attaveqarfigisariaqarput.
Pinartoqartillugu Aasiaat Radio normu 112 atorlugu attaveqarfigineqarsinnaavoq, attaveqarniarnerli ajortittarsinnaalluni.
