Kalaallit Nunaanni Pinerluttunik Isumaginnittoqarfimmut Pisortaqarfik allatut taaguserneqassaaq
Kalaallit Nunaanni Pinerluttunik Isumaginnittoqarfimmut Pisortaqarfik ukiortaamit taaguuteqalissaaq Kalaallit Nunaanni Pinerluttunik Isumaginnittoqarfimmut Qullersaqarfik. Danmarkimi pisortaqarfimmut assinganik taaguuteqartumut paarlaanneqarsinnaaneranik ajornartorsiuteqarsimanera allanngortitsinermut pissutaavoq.
Allattoq Peter Troelsen, Simon Uldum
decembarip 11-at 2013 08:41
Pinerluttunik Isumaginnittoqarfimmut Pisortaqarfimmik taaguutilik siunissami ataasiinnanngussaaq, taannalu Københavnimi inissisimavoq, Kalaallit Nunaanni Pinerluttunik Isumaginnittoqarfiup pisortaa Hans Jørgen Engbo taama nalunaaruteqarpoq.
Pinerluttunik Isumaginnittoqarfiup Kalaallit Nunaanni pinerluttulerinermi inatsimmi pisortatigoortumik taaguutaa tassaavoq "Pinerluuteqarsimasunik Isumaginnittoqarfimmi aqutsisut", tassanilu atorfeqarput pisortaq, pisortap tullia, aqutsisooqatigiit kiisalu allattoqarfik - taakkulu siunissami Qullersaqarfimmi atorfilittut taaneqartalissapput.
