Kalaallit Nunaanni piiaaffiit annersaata pilersinneqarnissaa kinguartinneqarpoq

Canadamiut aatsitassarsioqatigiiffiata Quadra Miningip Tunup Avannaani molybdænimik piiaavissamik aallartitsinissaraluani kinguartippaa. Nunarsuarmi tamarmi aningaasaqarnikkut ajornartoorneq kiisalu aatsitassat akikilligaluttuinnarnerat kinguartitsinermut peqqutaatinneqarput. Aviisi Berlingske Tidende taama allaaaserinnippoq.
Allattoq Louise M. Kleemann
novembarip 18-at 2008 07:07

Nunarsuarmi tamarmi aningaasaqarnikkut ajornartoornerup kinguneranik aatsitassat akikilligaluttuinnarput.

Tunup Avannaani Mestersvigimi umiarsualiviliornissamik, aqqusinniornissamik, illoqarfiliornissamik kiisalu aatsitassarsiorferujussuarmik pilersitsinissamik pilersaarutit taamaalillutik unitsikkallarneqarput. Molybdænimik piiaavissaq 5 milliardi koruuninik akeqassangatinneqaraluarpoq. Molybdæn sisammut akutut atorneqartarpoq.

Aatsitassarsiorfiit pingasut aningasaqarnikkut ajornartoornermit, aatsitassat akikilligaluttuinnarnerannik kinguneqartumit, taamaalillutik eqqorneqarput.

Aningaasaqarnikkut ajornartoornerup kinguneranik aamma Nanortallip eqqaaniittoq Nalunaq kuultimik piiaajunnaassaaq aammattaarlu Maarmorilimmi zinkimik piiaaffissap aallartinnissaa kinguartinneqarluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq