Kalaallit Nunaanni periuseq Nunavummi atorfilinnit nersorneqarpoq

Uuliamik gassimillu qalluisoqalersinnaanissaa pillugu Kalaallit Nunaanni sulilluartoqartoq, Nunavummi susoqanngilaq, Nunavummi aningaasaqarnermut angallannermullu ministerip tullia, Gordon Mackay, nunat pisuut, G7-imik taaguutillit, Eqalunni sapaatip-akunnerata siuliani ataatsimiimmata Nunatsiaq Newsimut taama oqarpoq.

- Uuliap gassillu Nunavummi nassaassaasinnaasup annertoorujussuunissaa ilimagineqarpoq, susoqanngilarli, Mackay oqarpoq.

Uuliamik gassimillu qalluinissaq pillugu Nunavummi misissuinerit 1985-imi unipput, aallarteqqinnissaallu ilimanaateqarpiarani. Tamatumunnga pissutaasinnaasut Gordon Mackayip taakkartorpai:

- Canadami oqartussaasut soqutiginninngillat. Uuliamik gassimillu qalluinissaq pillugu Nunavummi aqutsisussanik peqanngilaq, uuliamik gassimillu qalluinermi aningaasat isertitsissutaasinnaasut amerlassagunaraluaqisut, uuliasiorfiit Canadap kujasinnerusortaani misissuerusunnerupput, soorlu nunap immikkoortuani Albertami, Gordon Mackay oqarpoq.

Uuliap Baffinip Kangerliumarngani nassaassaasup annertungaatsiarnissaa ilimagineqarpoq, nappartat 2,5 miiliardit immerneqarsinnaanissaat ilimagineqarluni.