Kalaallit Nunaanni nioqqutissat akii qaffasinnerujussuupput
- Danmarkimi avanceloveqarpoq, tassa qummut killilimmik qanoq akitsuisoqartarnissaanut inatsiseqarluni. Kalaallilli Nunaanni killormoortuanik peqarpugut, taannalu allanngortinneqanngippat niuertut killeqanngiusartumik akinik qaffaasinnaanerat inatsisitigut akuerisaanera ilumut taamaaginnassanersoq oqallisigineqartariaqarpoq, Nikolaj Ludvigsen oqarpoq.
Nioqqutissat assigiinngitsut akii Brugsen Nuummi nioqqutissallu Københavnimi SuperBrugsen Sydhavnimeersut misissuiffigaavut, akiilu assigiinngissuteqangaatsiartut paasillutigu.
Kaassuartakkat nioqqutissanut atortut SuperBrugsenimiittut nioqqutissanik ulikkaarniarutsigit nioqqutissat 672 koruunit missaannik akeqarput, nioqqutissallu assingi Nuummi Brugsenimi 859 koruunit missaannik akeqarlutik, tassa 200 koruunit missaannik akisunerullutik.
Taamaammat akit pillugit isumasioqatigiittoqarnissaa Nikolaj Ludvigsenip ujartorpaa:
- Isummersoqatigiinnissarput killeqqunneqarsinnaanngilaq. Taamaammat neriuppunga Naalakkersuisut akuerissagaatigut akit qanoq iliornikkut pakkersimaarneqarnissaat pillugit isummersoqatigiinniassagatta, Atuisartunut Siunnersuisoqatigiit siulittaasuat Nikolaj Ludvigsen oqarpoq.
Punneq Kærgården, safti, qajuusat, sioraasat, issingigassat, equutissiat køkkenrullillu akii misissorpavut, akiilu assigiinngitsorujussuusut paasinarsivoq.
Assersuutigalugu taaneqarsinnaapput sioraasat 2 kiilut. Danmarkimi SuperBrugsenimi 19,95 koruuneqartut, Nuummi Brugsenimi 34,95 koruuneqarput. Equutissiat arfineq-pingasut Nuummi 21,95 koruuneqartut, Danmarkimi SuperBrugsenimi 13,25 koruuneqarput.
