"Kalaallit Nunaanni kiffaanngissuseqartutut misigisimanarpoq"
- Kalaallit Nunaanni kiffaanngissuseqartutut misigisimanarpoq, nukappissap aappaa T, Atuagagdliutinut oqarpoq. Ikinngutaalu Biilo tapersiivoq: - Allaannginnami seqinertittarfimmi seqinertilluni, akornusersuisoqarneq ajorpoq!
Ikinngutigiit taakku aqqaneq-marlunnilli ukioqarlutik ikinngutigiilersimasut, arlaliannguaannarnik pakatsissuteqarput.
- Isarukitsoqanngilaq! Aamma nanoqanngilaq! Tamanna pakatsissutigaara, Biilo oqarpoq. Ingammik nukappissat taakku marluk Grønlandsbankip ilisarnaataa, isarukitsuusorisartik takoreerlugu pakatsipput.
- Soormi Grønlandsbanken isarukitsumik ilisarnaateqassava Kalaallit Nunaanni isarukitsoqanngippat? Biilo oqarpoq.
Tamatuma saniatigut - Atuagagdliutini allaaserisaq naapertorlugu - ikinngutigiit taakku annilaarutigaat Nunatsinni 1½ liiterinik colasisoqarsinnaanngimmat aamma neriniartarfinnik McDonaldinik soqanngimmat.
- Tamanna Kalaallit Nunaata præsidentiata iliuuseqarfigisariaqarpaa, siunnersuipput.
Taamaattorli imeq kuuffitsigut kuuttoq nillarissoq silaannaallu panernera puigorallarnavianngilaat.
- Chipsiuteqarpugut ullut qulit ammasinnaasunik Chipsit ajortunngunngillat, tassa Kalaallit Nunaat taama silaannaritsigaaq, ikinngutigiit oqarput.
- Kalaallit Nunaat ajortortaqanngilaq! Nuna iluataffiuvoq. Taamaattumik Kalaallit Nunaat ullorissanik tallimanik tunerusupparput aamma tikeraaqqikkusupparput, ikinngutigiit Atuagagdliutinut oqarput.
