Kalaallit Nunaanni Inuttut Pisinnaatitaaffiit pillugit Siunnersuisoqatigiit siulliit ippassaq inissitsiterput
-Nuannaarutigaara Siunnersuisoqatigiit tamakkerlutik siulittaasutut qinermannga, sulinissamilu innuttaasut peqataatinneqarnissaat qilanaaraara. Tassunga atatillugu pingaartutut maluginiarneqartussaq tassaavoq, Siunnersuisoqatigiinni ilaasortat kattuffinnit amerlasuunit assigiinngissitaartuniillu aggersuunerat, siulittaasutut qinerneqartoq oqarpoq.
Siulittaasup tulliatut qinigaasup siulittaasup oqaasianut tapersiilluni ilaatigut ima oqarpoq:
-Inuttut Pisinnaatitaaffiit pillugit Siunnersuisoqatigiinnik pilersitsineq oqaluttuarisaanermut ilannguppoq, Inatsisartunillu annertuumik isumaqatigiissuteqarsimanermik tunngaveqarluni. Nunarsuarmioqatigiit isigalugit Kalaallit Nunaanni inuttut pisinnaatitaaffiit inissisimanerat pitsaasuuvoq, kisianni unammilligassaqarpugut, taakkualu ersarissarlugillu suliniuteqarfigissavavut, Aaja Chemnitz Larsen oqarpoq.
Siunnersuisoqatigiit inissitsitserlutik ataatsimiinnerminnut atatillugu innuttaasunut paasissutissiissutissanik suliaqarnissartik pingaarnertut aalajangiuppaat. Tassunga ilutigitillugu Siunnersuisoqatigiinni ilaasortat imminnut suliakkerput, tassalu inuttut pisinnaatitaaffinnik suliaqarnermut atatillugu unammilligassat Siunnersuisoqatigiinni ilaasortat isaannit isigalugit suunersut suliarissallugit. Siunissami suliassanik salliutitassanik suliaqarnermi taakkua tunngavigineqassapput.
