Kalaallit Nunaanni innuttaasut DNA-vannik misissuineq saqqummersinneqartoq
Ilisimatusarsimasut Danmarkimeersut misissuinerisa tamanna takutippaa, inernerillu atuagassiami ataqqisaasumi American Journal of Human Geneticsimi saqqummiunneqaqqammerlutik.
Kalaallit Nunaat ukiut kingulliit 5000-it ingerlaneranni arlaleriarluni innuttarsimavoq. Issittumi najugalinnit, Europamiunillu - soorlu vikingit qallunaatsiaallu. Inuiaat nunamiit nunamut Inuup sananeqaataanut ilisarnaatitut takussutissat Nunatsinni ineriartornerannut tamanna sunniuteqarsimavoq, Nunatsinnilu innuttaasut DNA-vanni tamanna maanna takuneqarsinnaalersimalluni.
Tassami Nunatsinni innuttaasut 75 procentiisa missaasa DNA-vat naggueqatigiit Inunneersoq, sinnerilu Europamiut DNA-vanneersuusoq misissuinerup nutaap takutippaa:
- Inuulli sananeqataanut ilisarnaatitut takussutissat Kalaallit Nunaata iluani agguataarneqarnerat assigiinngisitaartorujussuupput. Assersuutigalugu Tasiilami innuttaasut amerlanersaat Europamiut DNA-vannik akoqanngillat, Kitaanilu innuttaasut amerlanersaat Europamiunit naggueqatigiillu Inunnit kingoqqisuunerat takuneqarsinnaalluni, ilisimatusarsimasut ilaat Ida Moltke, Københavnip Universitetianeersoq, oqarpoq.
- Kalaallit Nunaannilu inuit amerlavallaanngimmata, inuup sananeqaataanut ilisarnaatitut takussutissat ineriartornerat sukkasimaqaaq. Timip kingornussaanut tunngasut qiviarutsigit paasissavarput Qaanaarmiup DNA-va Tasiilamiup DNA-vanut assigiinngissutaa, qallunaap DNA-vata Italiamiullu DNA-vannut naleqqiullugu annerujussuusoq, Københavnip Universitetiani lektori Anders Albrechtsen, oqarpoq.
Inuup sananeqaataanut ilisarnaatitut takussutissat pillugit Kalaallit Nunaanni taama misissuisoqarsimanera nappaatit atugaalersarnerannut misissuinermut aamma atorneqarsinnaapput, assersuutigalugu sukkornerup atugaanerata katsorsarneqarsinnaaneralu pillugu paasissutissat pissarsiarineqarsinnaassallutik, Ida Moltke naggasiilluni ilaatigut oqarpoq.
