Kalaallit Nunaanni innuttaasut affangajaat pissakilliortuupput

Nunatsinni piitsutut inuusut tassaapput meerartallit, 25-it inorlugit ukiulinnik inersimasortallit, meerartallit ataasiinnarmik pilersuisullit, arlalissuarnik meerartallit, nunaqarfimmiuunerusut aamma inersimasortaat nunatsinni inunngorsimasuusut. Taakkulu innuttaasut affangajaraat. Nunatsinni inoqutigiit isertitai najoqqutaralugit meeqqat atugaannik misissuinermik allaaserinnittoq Innuttaasut peqqissusaannik (cand.scient i folkesundhed) aammalu Københavnip Universitetiani ilisimatusartoq Christina Schnohr, misissuinini pillugu ima oqarpoq.
septembarip 17-at 2007 17:08

Kommunit kisitsisaataannik misissuivunga, kisitsisinilu isertitatut allassimasut soorunami assigiinngeqaat. Kommuniniillu kommuninut meeqqat atugaat paasiniaraanni, najugaqatigiiaat qanoq isertitaqqortutiginerat meeqqanut 1.000-nut amerlassusilertarpagut, taamaalilluta sumi inoqutigiit, qassinik meerartallit qanoq isertitaqartiginerat takusinnaalertarlutigu, Christina Schnohr aallartippoq.

Kisitsisit atorneqartut kommuninit 17-ineersuupput, illoqutigiit 8.082-it misissuinermi aallaavigineqarlutik. Kisitsisit 2004-meersut Kalaallit Nunaani Naatsorsueqqissaartarfimmeersuupput.

MIPI - Meeqqat Inuusuttullu Pillugit Ilisimasaqarfik misissuisitsisuuvoq “Meeqqat piitsuunerat”-nik taasimallugu.

Illoqutigiit isertitakitsut tassaagajupput angajoqqaat kisimiillutik pilersuisut. Taakku 18 procentiupput, taakkunannga angutit 4 procentit arnallu 14 procentit. Piitsutut nalilikkat aamma tassaapput 25-it inorlugit ukiullit, tassaasinnaallutillu ilinniartut meeqqaminnik pilersuisuusut. Nunaqarfimmiuuneq aamma isertitakinnermut pissutaaqataasartoq misissuinerup takutippaa. Tassami Nuummi isertitaqqortunerpaasoqarpoq, illoqarfiit sinneri akunnattumik isertitaqarfiusut, nunaqarfinnilu isertitat agguaqatigiissinneranni ilaat allanit 50.000 koruuninik ikinnerusunik ukiumut isertitaqartartut paasinarsivoq.

Nuna tamakkerlugu isertitat agguaqatigiissikkaanni inersimasoq ukiumut 153.405 koruuninik isertitaqartarsimavoq, taamaalilluni minnerpaaq annerpaarlu agguaqatigiissikkaanni 127.459 koruuniulluni. Taassuma affaanik appasinnerusumilluunniit isertitallit 64.000 koruunit missaanniittunik, piitsutut nalilerneqartartut, ilisimatusartoq Christina Schnohr oqarpoq.

Kisitsisit aamma takutippaat illoqutigiit ilarpassui pisortanit ikiorsiissutinik, tassa agguaqatigiissillugu isertitanit ikinnerungaartunik inuuniuteqartut.

Oqaatigineqarportaaq piitsuullutik peroriartortut amerlanersaat kalaaliusut nunaqavissut.

Piitsuussusermik misissuineq suliani siullersaavoq, politikerinullu sakkussaalluarmat malitseqartitassaqqissuusoq, Christina Schnohr isumaqarpoq.

Misissuinermi inoqutigiit 0-17-inik ukiulinnik meerartallit paasissutissartaat ukioq 2004-meersut atorneqarput.

Saqqummersitarlu Kalaallit Nunaanni meeqqat inuuniarnerat pillugu saqqummersut immikkoortut aapparaat. Saqqummersitat tullerissavaat “Kalaallit Nunaanni meeqqat inuuniarnerat”.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq