Kalaallit Nunaanni Eqqartuussivik pilersinneqassaaq

Eqqartuussiveqarfimmik iluarsaaqqiinermut atatillugu eqqartuussivimmik nutaamik pilersitsoqarpoq, taaguuserneqartumik Kalaallit Nunaanni Eqqartuussivik, Danmarkimilu Eqqartuussivinnik Aqutsisoqarfiup eqqartuussisussaq toqqareerpaa. Taanna tassaavoq Nunatta Eqqartuussiviani nunap eqqartuussisuunerata tullia 40-nik ukiulik Thomas Trier Hansen.
juunip 11-at 2009 07:03

Taanna nunanit allanit nunasiniartunut allaffeqarfimmi fuldmægtigitut atorfeqarsimavoq tamatumalu kingornagut Inuit Pisinnaatitaaffiinut Institutimi atorfeqarsimalluni. Tamatuma saniatigut eqqartuussiveqarnerup iluani suliffeqarfinnik ineriartortitsinermik suliaqartarsimavoq, ilaatigut Europami, Aasiami, Amerikami Qiterlermi Afrikamilu.

Kalaallit Nunaanni Eqqartuussiviup suliat maannakkut Nunatta Eqaartuussiviani siullermiikkatut suliarineqartartut, 2010-mi januaarip aallaqqaataaniit suliarisalissavai. Nunatta Eqqartuussiviata suliat sinerissami eqqartuussivinniit aamma Kalaallit Nunaanni Eqqartuussivimmiit suliareqqitassanngortinneqartut siunissami kisiisa suliarisalissavai. Aammattaaq eqqartuussivinni sulisunik Nunatta Eqqartuussiviata ilitsersuisarnera ilinniartitsisarneralu eqaartuussiviup ingerlatilissavai, soorluttaaq eqqartuussiveqarfimmik aqutsineq aamma nutserisoqarfik Kalaallit Nunaanni Eqqartuussivimmut nuunneqassapput.