Eqqartuussiviit ammaqqippata suliassat 75 procentii taamaallaat suliarineqarsinnaassasut, Danmarkimi eqqartuussiveqarnermut aqutsisoqarfiup nalilerpaa.

Kalaallit Nunaanni Eqqartuussiviit ammaqqilersut

Nunarput ammariartoqqippoq, eqqartuussiviillu ammaqqinnissaminnut aamma piareersaleruttorput.

Kalaallit Nunaanni Eqqartuussiviit coronavirusip ajornartorsiortitsinera pissutigalugu marsip ulluisa 13-iannili upalungaarsimalerput.

Eqqartuussiviilli ataasinngornermi apriilip ulluisa 27-anni ammaqqissapput. Kalaallit Nunaanni Eqqartuussiviit sapinngisamik amerlanerpaamik peqqissutsimut imannaatsuutitsinissaq eqqarsaatigalugu suliarinnissallutik nalunaarutigaat. 

Eqqartuussiviit pinerluttulerinermut ilaqutariinnermullu tunngasut suliareqqaassavaat. Taamaalioreerunik pingaarnersiuinikkut tulleriiaaralutik suliarinnissapput. 

AAMMA ATUARUK Kalaallit Nunaanni Eqqartuussiviit coronavirusi pissutigalugu matuneqarallartut

Tunillatsissinnaaneq aamma sulianik pingaarnersiuineq eqqartuussiviillu ataasiakkaat peqqissutsimut piumasaqaatinik naapertuinersut eqqartuussiviit ammaqqinneranni eqqummaariffigineqassasut, Kalaallit Nunaanni Eqqartuussiviit tusagassiorfinnut nalunaarput. 

Eqqartuussiviit ammaqqippata suliassat 75 procentii taamaallaat suliarineqarsinnaassasut, Danmarkimi eqqartuussiveqarnermut aqutsisoqarfiup nalilerpaa.

Kalaallit Nunaanni Eqqartuussiviit Danmarkimi Eqqartuussivinnut ilaapput. Danmarkimi Savalimmiunilu eqqartuussiviit aamma ammaqqipput. 

Isummersuutit