Kalaallit Nunaanni Brugseni-p siulersuisui ataatsimeersuassaaq

Kalaallit Nunaanni Brugseni KNB-p siulersuisui Aalborg-imi qaammatip tulliani ataatsimiissapput.

- Tamatumunnga pissutaavoq 2005-mimi naatsorsuutit naammassissammata. Naatsorsuutit siulersuisuni akuersissutigineqareerpata, naatsorsuuserisutta najugaqarfiani, Aalborgimi, atsiorneqassapput. Taamaalisoqareerpat naatsorsuutit ingerlaannaq Danmarkimi naqiteriffissaminni naqinneqassapput, siulittaasoq Arne Lund nassuiaavoq.

Kalaallit Nunaanni Brugsenip, illoqarfinni arfineq-marlunni 24.000-it missaannik ilaasortaqartup, 2004-mi 517 mio. koruunit kaaviiaartissimavai, 17.8 mio. koruuninik sinneqartooruteqarsimalluni.

Nanortalimmi Nuummilu pisiniarfiit 2005-mimi annertuumik nutarterneqarsimapput. Aamma Nuummi Tele-p illorsuartaavata quleriivisa ilaat pisiarineqarpoq, allattoqarfittut atorneqalersimalluni. Tassalu 2005-imi katillugit 60 mio. koruuninik KNB aningaasaliissuteqarsimavoq.