Kalaallit Nunaanni Assammik arsartartut Kattuffiat siulersuisortaarpoq
Siulersuisunut ilaasortat sisamat tunuarput, kingornatigullu siulersuisunut ilaasortaasimasut e-mailikkut sorsuunnerat nuannerpallaanngitsoq tusagassiortunit allanillu soqutigisaqartunit malinnaaffigineqartoq ingerlanneqarsimalluni. Tassani ajoraluartumik paasinarsivoq nunanut allanut unammisartut pingaarnerutinnagit timersoqatigiiffiit soqutigisaat pingaarnerutinneqartut. Siulersuisunngortut suliassaasa pingaarnersarissavaat kattuffiup iluani eqqissisaanissaq.
Aallartitat immikkut ittumik ataatsimiinnerat ippassaq pivoq, tassanilu siulersuisut nutaat toqqarneqarput. Siulittaasunngorpoq Nuka Ole Berthelsen Kâgssagssummeersoq, taassuma siulittaasumut qinigassanngorteqatigalugit Inga Dora Guðmundsdóttir Markussen K-33-meersoq siulittaasuusimasorlu Boas Møller.
GHF-imi siulersuisunngortut tassaapput:
Siulittaasoq: Nuka Ole Berthelsen
Siulersuisunut ilaasortaq: Kristian Heilmann
Siulersuisunut ilaasortaq: Hans Lyberth
Siulersuisunut ilaasortaq: Lars Erik Gabrielsen
Siulersuisunut ilaasortaq: Gunnar Sørensen
Siulersuisunut ilaasortaq: Leif Løvstrøm Mathiesen
Siulersuisunut ilaasortaq: Susan Guðmundsdóttir Johnsen
Sinniisussaq: Karen Marie Kyed Meyer
Sinniisussaq: Edvard Ostermann Egede
Sinniisussaq: Anders Lund Mølgaard
Assammik arsarlutik nunanut allanut unammisartut ukiut qulit matuma siorna inissisimaffigisimasaata anguniarnissaa ajornakusuussaaq. Angutit arnallu nunat tamat akornanni ukiuni arlalinngulersuni angusarissaarpallaarsimanngillat, naak nunatta angissusaanut timersoqatigiiffiillu amerlassusaannut naleqqiullugu pikkorissorpassuaqaraluartoq.