Kalaallit nr. 6-inngorput

Assammik arsaalluni Amerikami kujallermi pissartanngorniunnerit Panamerikanske mesterskaber naammassipput, kalaallit nunanut allanut unammisartui nummer seksinngorput.
Allattoq Jaaku Lyberth
juunip 27-at 2010 13:18

Kalaallit unammisartui Uruguay-mut unammigamik 27-nik isertitaqarlutik ajorsarput, Uruguay 30-nik isertitaqarluni ajugaasoq.

- Ajuusaarnaarpoq pisariaqanngitsumik ajorsarneruvoq. Unamminerup ingerlanerani pisariaqartitsinerpaaffimmi amerlasuut akiuutinngillat, Kalaalit Nunaanni Timersoqatigiit Kattuffianni siulittaasup tullia John Jakobsen tusagaassiuutinut taamatut allagaqarpoq.

Minik Dahl Høegh aamma Hans Peter Motzfeldt unamminermi isertitsinerpaapput, tamarmik arfineq marlunnik isertitaqaramik.

Unamminerup immikkoortuani siullermi Kalaallit unammisartui marlunnik kinguaqqapput, immikkoortuata aappaata ingerlanerani naligiillutik. Unamminerup naammassinissaa minutsinik arfinilinnik sioqqullugu kalaallit unammisartui Uruguayimiullu naligiipput tamarmik 26-nik isertitaqaramik.

Unamminerup naalernerani minutsit arfinillit kingullit ingerlaneranni kalaallit ataatsimik isertitaqarput, Uruguayimiut tallimanik isertitaqarlutik ajugaasut.

Assammik arsaalluni amerikap nunavittaaneersut pissartannngorniunneranni Panamerikanske Mesterskabernermi Argentinamiut pissartanngorput, Brasiliamiut normu 2-nngorlutik sølvinnattut Chile-miut bronzinnallutik normo 3-nngortut.