Assammik arsarneq: Kalaallit Norcami finalemut anngupput – finalemi unammisassaat suli inissinngillat
Assammik arsarluni VM-mut anngunniunnermi Norcami sisamanngornermi unammisoqassanngillat ullut pingasut siulliit Nuummi timersortarfissuarmi Inussivimmi pikkusuffioreersut.
Killiffik imaappoq; kalaallit USA-mut ajugaarujussuareerlutik finalemut annguttut aamma Canada aamma Mexico finalemut anngunnissamut periarfissaqarlutik.
- Taakkunannga Canada finalemut anngunnissamut periarfissaginneruvoq, Amerika avannarlermi Caribiamilu assammik arsartartut kattuffianni NACHC-mi unammersuarnermut ataatsimiititaliami siulittaasoq Kurt Lauritsen KNR-mut oqarpoq.
Canada sisamanik pointeqarpoq Mexicoli marluinnarnik pointeqarallarluni.
Tallimanngornermi unnukkut Canada aamma Cuba unammissapput tassanilu Cuba ikinnerpaamik målinik arfineq marlunnik ajugaassappat Mexico finalemut anngunissamut periarfissaqalissaaq.
Taama pisoqassappat arfininngornermi unamminissat aalajangiisussanngussapput. Caribiamiummi qeqertaat arfininngorpat USA-mut ajugaanissamut periarfissaqarluarpoq USA kalaallinut 27-12-mik ajorsarujussuareersoq.
- Kalaallit aamma peqqarniilaartumik eqqarsassagunik kikkut finalemi unammerusunnerlugit aalajangersinnaanngorsinnaavaat. Tassami Mexico kalaallinut ajugaanermigut finalemut anngussinnaagami, Kurt Lauritsen oqarpoq, erseqqissarluguli tamanna periarfissaq malittarisassatigut taamaallaat atuuttoq.
Canada Mexicomut pingasunngornermi unnukkut 23-25-mik ajugaavoq ullorlu naggaserluaqalugu kalaallit USA-mut 27-12-mik ajugaapput. Ministeriuneq Mette Frederiksen isiginnaartuniippoq kalaallit unammisartut kiataannik atorluni.
Pingasunngornermi angusat:
Canada – Mexico 32-25
Grønland – USA 27-12
Tallimanngornermi unamminissat:
Nal. 17.30 USA – Mexico
Nal. 20.00 Canada - Cuba
