Kalaallit nipilersugaat internettimiilissapput
Nipilersukkat nunatsinneersut nunarsuarmi sumiluunniit internettikkut tusarnaarneqarsinnaalertussanngorput.
Nipilersukkanik nunatsinneersunik internetti iluaqutigalugu nunarsuarmut tamarmut siammarterinermik suliaqartuuvoq immiussisarfik Ulo.
- Nipilersukkanik 1973-imiilli immiunneqarsimasunik katersuisimavugut, nipilersukkat pineqartut ilarpassui pisiarineqarsinnaajunnaarnikuupput, internettilu aqqutigalugu pisiarineqarsinnaalerpata nipilersukkat nipilersortunit isertitaqaataasinnaalissapput, immiussisarfimmik Ulo-mik aallartitseqataasimasoq Karsten Sommer oqarpoq.
Nipilersukkat nunatsinneersut internettikkut nipilersukkanik siammartiterisarfik Itunes aqqutigalugu siammartiterneqassapput, taannalu aqqutigalugu nunarsuarmi sumiikkaluaraanniluunniit tassa akiliilluni aaneqarsinnaalissallutik.
Nipilersukkanik siammartiterneqartussanik piginnittuunerup pitsaanerpaamik qularnaarneqarsimanissaa pillugu Koda saaffigineqarsimasoq, Karsten Sommer oqarpoq.
Nipilersukkat nunatsinneersut ukiup matuma naannginnerani internettikkut aaneqarsinnaalernissaat naatsorsuutigineqarpoq.
