Kalaallit nersorniagassanut ilaapput
Nunat avannarliit siunnersuisoqatigiiffiata nersornaasiuttagaat ukioq manna kimut tunniunneqassanersoq sisamanngorpat aalajangerneqassaaq.
Nunat avannarlliit siunnersuisoqatigiiffiata pinngortitamut avatangiisimullu atatillugu nersornaasiuttagaat, nunat avannaamioqatigiit aallartitanit aqqaneq-marluusunit aalajangerneqassaaq kimut tunniunneqassanersoq. Taakkua ullumikkut Nuummi naapeqatigiissapput.
Nersorniagassatut piukkunneqartut qulingiluaapput, toqqarneqartussallu assigiinngillat, tassaallutik; inuit ataasiakkaat, kattuffiit suliffeqarfiilluunniit pinngortitamut avatangiisimulluunniit kultoorimut attuumassuteqartunut, eriaginninnermut suliniuteqartunut.
Nersornaasiinissamut piukkunneqartut misissuataaraanni takuneqarsinnaavoq, Island-mi, Finland-mi Danmarkimilu illunik qangarsuarnitsanik eriagisallit aserfatsaaliiniartarnernillu suliniuteqartartut nersornaasiinissamut piukkunneqartunut ilaasut. Kalaallit Nunaanneersut piukkunneqartut tassaapput Garder Foundation-mik taaguutillit, Narsap kommunianinngaanneersut. Suliniaqatigiit Qassiarsummi Tjoldhilde-p oqaluffianik aserfattaaliinissamik suliniuteqartuupput.
Nunat avannarlliit siunnersuisoqatigiiffiata nersornaasiuttagaat Nunatta ataasiarluni pissarsiarisimavaa. Tassani ICC avatangiisit pillugit suliniuteqarsimaneranut atatillugu 1996-mi nersornaasiisoqarpoq.
Ukioq manna nersornaasiinissaq kimut tussanersoq sisamanngorpat aalajangerneqassaaq.
