Kalaallit nerisassiaat isumasioqatigiissutigissavaat
Tamanna novembarip 13-anni 14-annilu Nuummi Katuami, Nunatsinni Takornariaqarnermi Inuussutissarsiornermilu Siunnersuisoqatigiit aaqqissugaannik, USA-mut nerisassanik tuniniaasinnaaneq isumasioqatigiissutigineqassaaq.
Isumasioqatigiinnermi kalaallit nerisassanik tunisassiortartut USA-mi niuerneq paasisaqarfigissavaat, nerisassianut immikkut ittunut tuniniaanermi periarfissat aamma uumasunit tunisassiornermi avammut tuniniaanermi malittarisassat sammineqassapput.
Nerisassianut immikkut ittunut Amerikami tuniniaanermut immikkut ilisimasalik John Roberts aamma peqataassaaq.
Taassuma aaqqissuuttarpai nerisassanik nittarsaassinerit Fancy Foodinik taaneqartartut, taakkua USA-mi nerisassanik niuernermi nittarsaassisarnerit annersaraat, ukiumoortumik illoqarfinni Chicagomi, New Yorkimi aamma Californiami ingerlanneqartartut.
John Roberts Siunnersuisoqatigiit isumasioqatigiissitsineranni kalaallit nerisassanik tunisassiortuinut siunnersuissaaq aamma isumasioqatigiinnermi Washingtonimi danskit aallartitaqarfianniit najuuttoqassaaq.
Aamma Danmarkimi Inuussutissanut aqutsisoqarfimmeersumik, kalaallit nerisassiaannik immikkut ilisimasalimmik peqataasoqassaaq.
USA-mi burgerinik niuerfissuit taamaalillutik nerisassatigut unammillerneqarnissartik naatsorsuutigisinnaassavaat.
