Kalaallit namminneq tusagassiuisarnermut inatsiseqartariaqarput

- Kalaallit Nunatsinni pissutsinut tulluarsakkamik tusagassiuisarnermi akisussaassuseq pillugu nammineerluta inatsiseqartariaqarpugut. Taama nipilimmik Naalakkersuisooqatigiit siunnersuutaat Inatsisartuni ullumi oqaluuserineqarpoq. Kultureqarnermut Ilinniartitaanermut Ilisimatusarnermut Ilageeqarnermullu Naalakkersuisoq Siumumeersoq Tommy Marø inatsisissatut siunnersuummik saqqummiussisuuvoq. Tusagassiuisarnermi akisussaassuseq pillugu inatsisimmik Danmarkimi nunatsinnilu ukioq 2000-imiit atuuttumik naleqqussaarusunnertik Tommy Marøp ima tunngavilersorpaa:

- Kalaallit Nunaannut naleqqussarlugu inatsiseqalernissarput pingaaruteqarsimavoq, namminersuleriartornitsinni, aamma tamakkua ilaammata. Tusagassiuisarneq tusagassiortoqarnerlu ugaut nammineq maani ingerlappagut. Taamaammat uagut nunatsinni nammineq inatsiseqarnissarput pingaaruteqarsimavoq.

Danskit inatsisaat maani atuuppoq annertuumillu atorparput aammalu suli atortussaagipput Tommy Marø erseqqissaateqarpoq.

- Uagutsinnullu pingaaruteqarsimapput immikkoortut marluk, tassalu tusagssiuisarnermi maalaaruteqarnermi nævnip suliassaasa pisariillisarnissaanni, kikkut qanorlu naammagittaalliuteqarsinnaanerat qiviaraanni, assersuutigalugu maannakkut webaviseqarpugut assigisaannillu. Danskit inatsisaat malillugu nævniminngaanniit malersuisoqarsinnaanngilaq pineqaatissiisoqarsinnaananilu, inatsisissamilu eqqunngitsumik inuk tusarliunneqarsimappat, taava piumasaqaataalersussaavoq, nunatsinni electroniskiusumik tusagassiornermik atuisut nalunaaruteqartussaatitaanerat, tassa taanna eqqunneqartussaavoq.

Tusagassiuisarnermi aalajangersaasartut inuttalersorneqarnera aamma allanngortikkusunneqarpoq.

-Ilaasortassat danskit inatsiseqarnermut ministeriaqarfianit aalajangersarneqartarput, aali nunatsinniilluta. Taanna allanngussaaq inuttalersuisarneq nammineq tigussavarput, ilaasortallu amerlassusaat ataatsimik ilanngarpavut amerlaqatigiikkunnaarsillugit arfineq marluinnanngorlugit.

Nunatsinni tusagassiuutit pillugit aalajangiisartuni siulittaasoqarneq aamma allanngortikkusunneqarpoq.

- Inatsisilerituujunissaanik piumasaqaat allanngortipparput, siulittaasuussagaanni nunatsinni pissutsinik ilisimasaqarluartuunissaq qitiutikkatsigu.

-Ajoraluartumillu inatsisilerituutut ilinniarsimasut killeqarmata, piumasaqaat piumasaqaataajunnaarsikkusupparput.

Tusagassiuuteqarneq pillugu nammineq inatsiseqalernissatsinnik siunnersuut aappassaanneerneqartigani kulturimut ataatsimiitaliami suliassanngortinneqarpoq. Tusagassiuuteqarneq pillugu nammineq inatsiseqalernissatsinnik siunnersuut Qanoroomi unnugu aamma sammineqassaaq.