Kalaallit nallinnartuunngilluaasarput
Lill Rasted Bjørstip ph.d.-tut naammassissutimini, Københavnip Universitetiani qanittukkut illersukkamini, taama inerniliisoq,Videnskab.dk-mi ullumi allaaserineqarpoq.
Ilisimatusarnermi avatangiisinullu illersuiniat nunarsuarmi politikerit iliuuseqartinniarsaralugit Kalaallit Nunaat, nannut, ilulissat, sermersuaq kalaallillu ataasiakkaat nallinnartutut ilisarnaatinngortissimavaat. Kalaallilli namminneq taama isigineqarusunngillat.
Naalakkersuisut siulittaasuata Kuupik Kleistip ukioq manna oqaatigisaatut:
- Nunat tamalaat akornanni nunat immallu issittut pillugit isumaqatigiissusiorniarsaripput Sikuiuitsoq Kujallermut isumaqatigiissummut assingusumik. Nunat issittulli avannarliit inuuffigineqarput, sikuiuitsoq kujallerlu inoqarnani. Nunanilu issittuni avannarlerni inuusut ineriartorusupput, nunamilu pissarititat atorluarusullugit. Taamaattumik pingaartorujussuuvoq oqallinnermi isummagut saqqummiutissallugit nunallu allat oqaluuseriniagaannut ilaassalluta.
Suliffissanik pilersitsinissaq suliffissuillu soorlu aatsitassarsiornermut uuliasiornermullu tunngasut kalaallinut pingaarnerupput, silap kissakkiartornerata akiornissaaniit. Lill Rastad Bjørstip ph.d.-tut naammassissutaani tamanna erserpoq.
