Kalaallit naapitatta Dansk Folkepartiit isumaqatiginngilaat

Kalaallit namminersulernissaannut ukiut 50-t 100-lluunniit utaqqissasut Dansk Folkepartiit isumaqarput. Taakku taama isummernerat, inuit illoqarfimmi naapitatta ilaasa ingasagaat.

-Ullaaq tusarakku radio aviisimi ingasagilaartorujussuuara, ukiunngooq 50-t suli utaqqissaagut ingasappoq.

-Sooruna?

-Namminersulissagutta isumaqarama nunarput nammineq aquttariaqaripput.

-Illit isummat malillugu namminersulernissamut ukiut qassit naapertuuppat?

-Eqqoriaassaguma isumaqarpunga ukiut 25-t qaangiuppata naapertuunnerussasut.

Elisa Lennert Kaspersen taama isumaqarpoq, Aqqa Rosing aamma naapipparput.

-Isumaqatiginngeqaakka, taamak sivisutigisumik utaqqinissarput naatsorsuutiginngilara.

-Illimmi isummat malillugu ukiut qassit naapertuunneruppat?

-Apeqqutaavoq tamakku suliassat aaqqeqqaagassat qanoq pilertortigisumik naammassineqassanersut. Aammalu piumasaqaataasunut naammassinninnissarput qanoq sivisutigisumik anguniassaneripput. Immaqa ukiut 20-t 30-t qaangiuppata naapertuunnerussasoq imaassinnaavorluunniit piaarnerusumik.

-Mette Lynge, Danmarkimi Dansk Folkepartiit isumaqarput, nunarput namminersulissaguni ukiut 50-t 100-lluunniit nunarput utaqqeqqaartariaqartoq, taakku taama isummernerat qanoq isumaqarfigaajuk?

-Isumaqarpunga kukkunerujussuusoq, taavalu paasisimasaqannginnermik tunngaveqartoq. Uanga isumaqarama politikerit uagullu qanoq piumassuseqartiginerput apeqqutaasoq, taavalu angunissaanut qanoq ingilluta eqqartueqatigiinnissarput, soorlu qanorpiaq immitsinnut pilersussanerluta.

-Qaqugu namminersulerutta naleqqunnerussasoraajuk?

-Qaqugukkulluunniit uanga piareersimavunga namminersulernissatsinnut, taamaallaat apeqqutaaginnarpoq inuit qanoq pilliuteqarusutsiginersut. Aamma uanga qunuginngilara sulinerulissagaluaruma, namminiilivinnissarput angorusukkakku. Oqarsinnaavunga ukiut qulilluunniit qaangiuppata namminiilivinneq eqqunneqaraluarpat ajunngilaq, Mette Lynge naggasiivoq.

-Ukiut tallimat qulilluunniit alloriaqqinnissatsinnut akuerseqataarusoqaanga, kisianni taanna akuerisinnaanngilara danskit partiivisa isummiussaat ukiut 50-t 100-lluunniit iserfigeqqinniarutsigit kikkut eqqugaassappat? uagut! Taavaluaasiit avataaninngaanniit suliartortorpassuit nunap aningaasat kaaviiaartitassaralui annissussavaat.