"Kalaallit misilittagaat nunani ineriartorfiusuni atorluarneqarsinnaapput"
Kenneth Høegh kujataani nunalerinermut siunnersortinut pisortaanikuuvoq, ukiorlu Decemberimi ilaquttani ilagalugit Bangladeship kujataanut misilittakkaminik siammarteriartorluni aallarpoq. Nunami piitsuusumi nunalerinermik siuarsaanermi siunnersortitut Danida-miit atorfeqartinneqarluni sulissalluni.
Taamatut misilittakkanik paarlaaseqatigiittarnerit nunatta Danmarkimut neqeroorutigisinnaalluarai, Kuupik Kleist isumaqarpoq.
- Danmarkip nunanut ineriartortitanut sulinerminut periusissaminik nutaamik saqqummiussinerata nalaani, uagut nunatsinninngaanniit pisussaafittut isigiuarsimavarput nunarsuup sinnerani aamma nunap inoqqaavisa qanoq pissuseqarfigineqarnerat sunniuteqarfigerusullugu.
Kuupik Kleistip qallunaat Ineriartortitsinermut ministeriat Søren Pind ataatsimeeqatigeqqammerpaa.
- Aamma minnerunngitsumik ineriartortitsinermi ingerlatsinermi puigorneqannginnissaat uagut qulakkeerniassallugu pisussaaffik, pisussaaffitta ilaattut isigiuarsimagatsigu naaperusussimavarput.
Kuupik Kleist oqarpoq.
Tassanittaaq isumaqatigiissutigaat nunatsinni suliffeqarfiit assigiinngitsut misilittakkaminnik siammartererusussinnaanersut misissuiffigineqassasoq.
- Misilittakkat tamakkua iluaqutigineqarsinnaanerat erseqqippoq aamma pisariaqartinneqarluni, taamaattumik nunatsinninngaanniit taamatut siunnersuisutut aammalu ikiuuttutut inississinnaanerput taanna misissuiffigineqassaaq, suliffeqarfiit assigiinngitsut eqqarsaatigalugit, Kuupik Kleist oqarpoq.
Aalisarnerlu qiviaraanni, pimoorussamik siunnersuusiortoqassappat, Royal Greenland oqaloqataarusuppoq, nunanullu piitsunut misilittakkanik siammartereqataanissaminut ajukkutinngilaq.
Flemming Knudsen Royal Greenlandip pisortaanera makkunuuna ikiuussinnaalluni takorluugaqarpoq.
- Aalisakkerineq, akisussaassusilimmik aalisakkerineq, tigooraaneq, tuniniaaneq, qerititerineq, aalisakkap qaqinneraniit atuisunut niuernermut tunngassutillit tamaasa misilittagaqarfigaagut.
Suleriusitsinnullu sakkussagisagut atorluarneqarsinnaappata oqaloqataanissamut ammavugut, Flemming Knudsen oqarpoq.
Kuupik Kleist-ip qallunaat Ineriartortitsinermut ministeriat Søren Pind Nunatsinnut 2012-mi tikeraarsarpaa.
Siumup siulittaasuata Aleqa Hammondip Kuupik Kleistip Søren Pindimik tikeraarsaanera nuannaarutigivallaanngilaa. Søren Pind Nunatsinni sumut atussagatsigu? Kuupik Kleistip qaaqqusineranut qisuariaammini ippassaq taama allappoq.
- Nunap inoqqaavinut tunngasut Søren Pindip ICC-mik oqaloqatiginnissutigisariaqarpai. Tamannami inuiattut akuerineqarnitta kinguneranik Namminersorlutik Oqartussat akisussaaffik tamakkiisumik ingerlattussaajunnaareerpaat. Aamma Kuupik Kleist Nunani allani nunat inoqqaavisa ajornartorsiutai pillugit aaqqiiniartutut aallartitatut pissusilersorani, maani atukkavut salliutittariaqarpai, Siumup siulittaasua allappoq.
