Kalaallit meerartaat pujortarunnaariartorput
Misissuinermik suliaqartoq Birgit Niclasen, ilisimatusaatigalugu paasiniaanermini Paarisamik suleqateqartoq paasisaminik nuannaarutiginnippoq.
Kalaallit meerartaat tupamik millussinngisaannarsimasut amerlipput.
Meeqqat aqqanillit 15-illu ukiullit akornanni pujortartartut ikilisut, tupamillu millussinngisaannarsimasut amerliartortut, misissuereernerup kingorna paasinarsivoq
Assersuutigalugu taaneqarsinnaavoq, 15-inik ukiullit akornanni 40 procentii tupamik atuinngisaannarmata, tamannalu 1994-imi paasisanut sanilliullugu marloriaatinngorneruvoq, inuusuttuaqqat 23 procentiinnaai taamani pujortanngisaannarmata.
Paasisallu nutaat takutippaat, 15-inik ukiullit akornanni pujortartanngitsut maanna 61 procentiusut 1994-imilu 49 procentiinnaasut.
- Maannalu siullerpaamik oqartoqarsinnaanngorpoq meeqqat pujortartanngitsut amerlasuujusut, paasisanik nutaanik inerniliisoq, Birgit Niclasen oqarpoq. -Nuannaarutigilluinnarpara paasisat nutaat ukua saqqummiutissallugit, tassami siullerpaamik maanna oqarsinnaanngoratta, pinaveersaartitsinermik suliniarneq iluaqutaasoq, tassami pinaveersaartitsinermik sulinerup iluaqutaanera takussuseruminaatsuuvoq, maannalu takussutissaqalermat nuannaarutigeqaara, ilisimatusaatigalugu misissuisoq, Birgit Niclasen, oqarpoq.
Taanna isumaqarluinnarpoq pujortartanngitsut amerlineri pinaveersaartitsinermik suliniuteqartarnerup kingunerigaa.
- Isumaqarpunga paasisitsiniaasarnerit iluaqutaasimasut, sapaatip akunneratalu naanerani, Peqqinnissaq pillugu ataatsimeersuarnermi NunaMedimi, paasisannik saqqummiussileruma
oqallissaarerutigerusuppara pinaveersaartitsinermik suliniarneq iluaqutaasartoq, Birgit Niclasen oqarpoq.
