Kalaallit meerartaat ineriartorluartariaqarput
Kalaallit meerartaasa ajunnginnerusumik ineriartornissaat misissorneqartariaqaraluarpoq, taama oqarpoq, Inuit pisinnaatitaaffii pillugit ilisimatooq atuakkiortorlu FN-imeersumik paasissutissamik suliaqarsimasoq Steen Wulff.
- Kalaallit Nunaanni inooriaatsip pitsaassusia nunanut allanut ineriartortunut sanilliullugu eqqartussagutsigu marloqiusatut oqaatigineqarsinnaavoq. Taamaattumik pingaaruteqarpoq, Kalaallit Nunaanni piumasaqartoqartariaqarnera tassami meeqqat pisinnaatitaaffii naapertorlugit meeqqanut Kalaallit Nunaanniittunut tulluuttumik malittarisassiortoqartariaqalermat, taama oqarpoq Steen Wulff.
Nangipporlu:
- Misissuinerup ersersissavaa meeraq timikkut, sianissutsikkut, ileqqorissaarnikkut, tarnikkut, inuillu akornanniinnermigut ineriartortilluarneqassappat sutigut pisariaqartitsisoqarnersoq, taama oqarpoq Meeqqat Inuusuttullu pillugit Ilisimasaqarfimmut naalisarlugu MIPI-mik taaneqartartumut paasissutissiissummik suliaqarsimasoq Steen Wulff.
Alloriarnerli tulleq alloriarfiussappat, meeqqat inuusuttullu atugaat qanoq ilillugit pitsaanerulersinneqarsinnaappat?, MIPI-mi pisortaasoq Nina Banerjee aperaarput paasissutissiissut qanoq atorumaarneraat.
- Alloriarneq tulleq tassaavoq nunatsinni meeqqat inooriaatsimikkut pitsaassusaasa misissorneqarnissaat, maannalu tamanna aningaasatigut katersuupparput, maannamullu affaat tikillugit katersereerpugut, Nina Banerjee nassuiaavoq.
Taanna erseqqissaavoq suliamik ingerlatsinertik una ukioq naatinnagu ukiulluunniit tulliata aallartinnerani naammassineqassasoq.
- Misissuineq pingasoqiusamik aggorneqarsinnaavoq: Naatsorsueqqissaarinikkut, meeqqat angajoqqaallu apersorneqarnerisigut, apersuinermilu meeqqat salliutinneqassapput aningaasat meeqqamut qanoq isumaqarnerat ilaatigut apersuutigineqassalluni, tamanna inooriaatsip pitsaassusaata misissorneqarneranut attuumassuteqaqimmat. Pingajuattullu nutaanik paasisaqariarutta misissuiffigisinnaalissavarputtaaq, nunarsuaq tamakkerlugu meeqqat pillugit isumaqatigiissutaasumut misissugarput taanna sanillersuunniarsarisinnaalissagatsigu, taama Nina Banerjee naggasiivoq.
